Nesër në Maqedoninë e Veriut hyjnë në fuqi vendimet për zbutjen e masave anti-COVID. Bëhet fjalë për heqjen e maskave në ambientet e hapura, grupimi i njerëzve, lejimi i dasmave e të tjera, ndërsa ora policore do të mbetet në fuqi edhe për dy javë.
Shtabi Qendror i Krizës sot ka pranuar rekomandimet e Komisionit për Sëmundje Infektive dhe të njëjtat i propozon për miratim në seancë e nesërme të Qeverisë.
“Nga 1 qershori lejohet heqja e maskës në hapësirat publike, me rekomandim që maska të mbahet nëse numri i personave është më i lartë se 6 persona. Mbetet në fuqi masa që maska të mbahet në transportin publik, taksi dhe në të gjitha hapësirat e mbyllura, si shtëpitë e mallrave, dyqanet e qendra të mbyllura,” ka bërë të ditur Shtabi Qendror i Krizës.
Në mbledhjen e Shtabit të Krizës duke marrë parasysh uljen drastike të shifrave dhe të rasteve aktive, lejohet publiku edhe në ngjarjet sportive të cilat mbahen në ambiente të hapura deri në 30 për qind, nga kapaciteti i përgjithshëm i vizitorëve, me respektim të distancës mes vizitorëve nga 1.5 deri në 2 metra.
“Lejohet organizimi i dasmave, ahengjeve në ambiente të hapura, tarraca e oborre deri në maksimum 100 persona, dhe jo më shumë se 50 për qind e kapacitetit të hapësirës si dhe nga 6 persona në tavolinë. Do të lejohet muzika gjatë organizimit të dasmave, në pajtim me protokollin adekuat, por jo edhe vallëzimi,” thekson Shtabi Qendror i Krizës.
Sanksionimet do të jenë aktive derisa të hyjë në fuqi vendimi i Qeverisë dhe qytetarëve u bëhet thirrje që të kenë kujdes për secilën masë antiCOVID, pasi që toleranca ndaj tyre do të jetë zero.
Gjatë 24 orëve të fundit janë regjistruar 218 kundërvajtje për mos mbajtje të maskës. Ndërkaq, 27 persona janë gjobitur pasi që e kanë shkelur ndalesën e lëvizjes së lirë gjatë orës policore mbrëmë.
