Pas 8 muajsh mister merr fund enigma për fatin e biznesmenit Italian Davide Pecorelli, makina e të cilit u gjet e djegur në Pukë. Mësohet se, ai është gjetur i gjallë në Toscana në një anije në brigjet e Livornons.
Lajmi është bërë i ditur nga mediat italiane, të cilat kanë marrë prononcimin e gruas së 45-vjeçarit, e cila tha se kishte folur në telefon me bashkëshortin e saj dhe ai ishte mirë. Po ashtu babai i biznesmenit u shpreh shumë i lumtur dhe tha se mezi priste ta takonte për të marrë vesh çfarë ndodhi.
“Unë do ta përqafoj, pastaj do t’i tërheq veshët”, tha babai i Davides. Ai tregon për telefonatën me gruan e Davides e cila i ka dhënë lajmin e mirë për të birin. “Unë po shpresoja për të, edhe pse kishte kaluar një kohë e gjatë, ajo menjëherë më tha se kishte folur me Daviden dhe se ai është mirë, tani mezi po pres ta shoh përsëri, kështu që ai do të më thotë çfarë ndodhi”, është shprehur ai.
Gazeta “La Nazione” shkruan se Pecorelli u gjet dje, i gjallë dhe me shëndet të mirë, në rrethana ende të paqarta, në një gomone të mbytur pranë një ishulli, në bregdetin e Livornos.
Nuk kishte asnjë lajm për sipërmarrësin që nga fillimi i janarit të këtij viti, kur ai erdhi të bënte biznes në vendin tonë. Makina që ai mori me qira në aeroportin e Tiranës, një Skoda Fabia, u gjet në flakë natën midis 7 dhe 8 janarit rreth 30 km nga Puka. Brenda mjetit të shkrumbuar u gjetën objektet e tij personale dhe disa eshtra, ekzaminimi i të cilave nuk ka prodhuar rezultate të rëndësishme.
Pecorelli, i cili zotëron një restorant ka arbitruar gjatë karrierës në Serinë C italiane, si dhe ka shërbyer si arbitër i katërt në Serinë A. Ndërsa përveç hotelerisë, ish-arbitri ka investuar dhe në parukeri, ku ka hapur disa të tilla në Milano. Ai ka biznese edhe në Shqipëri prej një viti si dhe kishte një fëmijë me një grua shqiptare.
Shumë aspekte mbeten për t’u sqaruar se çfarë ka ndodhur me të vërtetë në muajt e fundit me biznesmenin, për të cilat kishte nisur hetimet prokuroria italiane dhe ajo shqiptare. Mësohet se Pecorelli është shprehur se do të paraqitet për të bërë deklarata në Prokurorinë e Perugias, e cila po ndjek rastin.
