Tërmeti me magnitudë 6.0 ballë që goditi Afganistanin lindor ka lënë të paktën 1 100 të vdekur dhe 3 000 të plagosur, deklaroi Yousaf Hammad, zëdhënës i Autoritetit Kombëtar të Menaxhimit të Fatkeqësive.
Autoritetet thanë se presin viktima të mëtejshme sapo ekipet e shpëtimit të arrijnë në vende më të izoluara, shumë prej të cilave mbetën të paarritshme për më shumë se 24 orë pas tërmetit.
Administrata ka vendosur helikopterë për të shpëtuar dhe transportuar nga ajri të plagosurit, pasi rrugët janë bllokuar për shkak të rrëshqitjeve të dheut të cilat po i pengojnë ekipet e shpëtimit të arrijnë në disa zona të prekura.
BE dhuron 1 milion euro për tërmetin në Afganistan
Bashkimi Evropian po dhuron 1 milion euro (1.16 milion dollarë) si dhe 130 ton materiale ndihme pas tërmetit të së dielës në Afganistan që la më shumë se 1 100 të vdekur.
‘’Financimi i emergjencës do t’u shkojë partnerëve humanitarë që tashmë po kryejnë operacione ndihme në terren”, deklaroi Komisioni Evropian
Përveç kësaj, komisioni do të dërgojë me aeroplan rreth 130 ton furnizime emergjente, të tilla si tenda, rroba, furnizime mjekësore dhe pajisje për pastrimin e ujit, në Kabul.
BE po vë në dispozicion shërbimet e saj satelitore për të ndihmuar në shpërndarjen e ndihmës.
“Ndërsa ky tërmet i ri në Afganistan vë presion shtesë në një situatë humanitare tashmë të rëndë, BE po ndërhyn për të ndihmuar”, theksoi komisionerja e BE-së për Menaxhimin e Krizave, Hadja Lahbib.
Lahbib shtoi se zonat e prekura ‘’kanë pritur shumë refugjatë afganë të kthyer nga Pakistani në muajt e fundit’’.
Financimi vjen përveç 161 milion eurove për organizatat humanitare aktive në Afganistan, të ndara më parë në vitin 2025.
Discussion about this post