Në fillim as ne nuk e besuam por duket se në gadishullin e pasur me naftë, e kanë super-seriozisht. Ajo që raporton Corriere dello Sport është e bujshme: klubet arabe duan të luajnë në Ligën e Kampionëve të UEFA-s.
Pavarësisht dy kompeticioneve ndërkombëtare me prestigj absolut si Kupa Arabe (e fituar pak ditë më parë nga Al-Nassr e Ronaldos) dhe Liga e Kampionëve të Azisë, sheikët janë duke synuar edhe kompeticionin më të madh të kontinentit të vjetër.
Në muajt e ardhshëm, ata mund të formulojnë një kërkesë shumë specifike drejtuar UEFA-s: të ketë një “Wild Card” për të hyrë në formulën e re të turneut në sezonin 2024-25 (jo më 8 grupe, por një grup i vetëm me 36 formacione si një kampionat i vërtetë, me 8 ndeshje për secilën skuadër para fazës eliminatore), kushtuar skuadrës fituese të Ligës Saudite.
Kjo do t’u mundësonte klubeve të tilla si Al-Ittihad dhe Al-Ahli i Jeddah ose Al-Nassr dhe Al-Hilal të Riadit të fitojnë edhe më shumë prestigj ndërkombëtar, të konkurrojnë kundër klubeve më të mira të kontinentit të vjetër dhe të rrisin përvojën dhe aftësitë e klubeve të cilat, pavarësisht nga shuma e madhe e parave të investuara në lojtarë dhe infrastrukturë, ende duken mjaft prapa për sa i përket organizimit të korporatave. Liga e Kampionëve është tashmë, një tjetër synim që futbolli arab i ka vendosur vetes për t’u bërë një pikë referimi absolute në shkallë globale.
Discussion about this post