Pas miqësores me Dinamon në qytetin e Librazhdit, verdheblutë u rikthyen menjëherë në Strugë, ku po vijojnë me fazën. Të besuarit e Nevil Dedes do të qëndrojnë atje edhe këtë javë, për t’u rikthyer sërish në qytetin e Elbasanit dhe të vijojnë përgatitjet për të qenë gati në startin e kampionatit.
Në Maqedoninë e Veriut janë bashkuar edhe dy lojtarët e afruar së fundmi, Bruno Telushi dhe Ardit Hoxhaj. Vlonjatët kanë hedhur firmën në kontratë, duke shtuar cilësinë në organikë. Duket se pak e nga pak po plotësohet edhe grupi i lojtarëve, që do të kenë si mision të vetëm ngjitjen në Superiore.
DEMTIMET
Skuadra ka pasur edhe probleme këto ditë. Mesfushori Eraldo Dede ka lënë grumbullimin për shkak të një dëmtimi të rëndë që ka pësuar.
Një frakturë e marrë gjatë një seance e ka detyruar që të kthehet para kohe në Shqipëri, Pas konsultave që do të kryejë, do kuptohet edhe shkalla e lëndimit dhe mbi të gjitha koha që do të qëndrojë jashtë. Është dëmtuar edhe Jeton Krasniqi, por për sulmuesin nuk ka vend për panik.
MERKATOJA
Edhe pse elbasanasit kanë qenë skuadra më aktive dhe ka afruar plot 15 lojtarë, shumica e tyre nga Superiorja, sërish ajo nuk konsiderohet e mbyllur. Nga njëra anë drejtuesit janë në pritje të “okazioneve” dhe nga ana tjetër po punojnë për të afruar në ekip një sulmues “pykë”.
Burime të “Panorama Sport” pranë klubit elbasanas pohojnë se presin që së shpejti t’u bashkohet edhe një sulmues nga Nigeria, por është dokumentacioni ai që po vonon.
Në fakt, Nigeria aktualisht ndodhet në një moment kritik sa i përket pjesës politike, ku mësohet se janë bllokuar edhe kufijtë, duke bërë që për momentin lojtari të mos udhëtojë dot drejt Shqipërisë. Mësohet se bëhet fjalë për një futbollist të afirmuar dhe nëse vjen në Elbasan do të jetë një vlerë e shtuar për skuadrën.
Gjithsesi, nëse kjo tratativë dështon, për ngjarje që nuk lidhen me futbollin, atëherë klubi do të vihet në ndjekje të një tjetër sulmuesi, për të kompletuar përfundimisht edhe organikën.
Por, edhe nëse deri në fund të merkatos nuk do të ndodhë asnjë afrim tjetër, sërish në Elbasan janë të qetë, sepse tanimë mund të thuhet se kanë një organikë me më shumë se 25 lojtarë për të përballuar sezonin./PanoramaSport
Discussion about this post