Miqësoret janë ndër mënyrat më efek tive për të harmonizuar një skuadër dhe sidomos kur ajo është rindërtuar nga e para. Ky është rasti tipik i Elbasanit, që deri në këtë fazë të merkatos ka afruar 13 futbollistë. Kanë planifikuar që të marrin edhe të tjerë, në një kohë që aktualisht vijojnë provën edhe dy të huaj (sulmues brazilian Leo Melo dhe mesfushori ekuadorian Zhoao Kuinonez). Të vendosur në këtë situatë, kolaudimi i grupit është një sfidë më vete.
PLANI ME MIQËSORET
Për këtë arsye, klubi ka projektuar edhe pesë miqësore të tjera gjatë fazës përgatitore. Duke nisur që sot, nis cikli i ndeshjeve. Kundërshtar do të kenë një tjetër ekip të Ohrit, Voskën, që këtë sezon është ngjitur në elitën e futbollit maqedonas. Të shtunën pastaj do të përballen me Dinamon, për të vijuar me Skënderbeun dhe Laçin nga Superiorja dhe për ta mbyllur me rivalin e Kategorisë së Parë, Luzi 2008. Këto sfida do të japin një pasqyrë më të qartë të Elbasanit të këtij sezoni, i cili hyn me petkun e pretendentit.
NGËRÇI ME GOLIN
Në dy miqësoret e para, ajo me Kukësin e mbyllur 2-2 dhe me Ohrin 0-0, është evidentuar se problemi qëndron te goli. Dede ka bërë mjaft eksperimente me të gjitha rolet, por thuajse për asnjë moment nuk ka pasur të gjithë së bashku në fushë ata që në letër janë projektuar për titullarë. Megjithatë, problemi i golit ka rënë në sy.
Ndaj Kukësit, Elbasani vërtetë shënoi dy gola, por një e realizoi me penallti, ndërsa tjetrin me një goditje nga jashtë zone. Bëhet fjalë për një Kukës që, edhe pse militon në Superiore, po rindërtohet nga e para dhe me shumë djem të rinj. Ndaj Ohrit, më pas nuk e gjeti dot rrugën e rrjetës, ndonëse mundësitë i patën dhe iu mohua një penallti flagrante.
Në repartin ofensiv, verdheblutë kanë një “ushtri” me lojtarë, por deri me tani askush nuk ka dalë në skenë që të bëjë goleadorin për skuadrën dhe që të ofrojë sigurinë, e cila kërkohet në këtë pozicion. Gjithsesi, kur kampionati do më shumë se një muaj të fillojë, Elbasani dhe Dede kanë të gjithë kohën e nevojshme në dispozicion për të gjetur çelësin që skuadra të funksionojë, sepse tani është ende në fazë eksperimentale./PanoramaSport
Discussion about this post