Ende pa filluar aventurën në Turqi, Dzeko “acarohet” me bordin e Fenerbahçe

Ka pak ditë që është transferuar në Turqi, por Edin Dzekos dhe Fenerbahçe që tani, kanë “acaruar” njëri-tjetrin, e gjitha… për një turne miqësor.

Ish-sulmuesi i Interit nuk ka ndërmend të marrë pjesë në turneun e planifikuar për në fillim të korrikut në Shën Petersburg të Rusisë, ku skuadra e tij e re është e ftuar të marrë pjesë së bashku me Zenit, Yllin e Kuq të Beogradit dhe Neftchi Baku.

Arsyeja është 100% politike, duke qenë se Dzeko ka dalë hapur kundër pushtimit rus të Ukrainës.

Sipas mediave turke, Edin, i cili tashmë doli hapur kundër miqësores ndërmjet ekipeve kombëtare të Rusisë dhe Bosnjës shtatorin e kaluar, do të kishte mbështetjen e disa bashkëlojtarëve, kryesisht të huaj, por nuk ka mbështetjen publike zyrtare të klubit.

Përkundrazi, duke qenë se Dzeko është regjistruar për të luajtur edhe miqësore, rrezikon edhe një gjobë nga Fenerbahçe.