Goditje të vazhdueshme ndaj veprimtarive kriminale në fushën e narkotikëve. Policia e Tiranës ka finalizuar me sukses operacionin policor të koduar “Shape”, duke sekuestruar një sasi të konsiderueshme lënde narkotike dhe duke vënë në pranga poseduesin e saj.
Në kuadër të këtij operacioni, shërbimet e Komisariatit të Policisë Nr. 4, në bashkëpunim me Seksionin për Hetimin e Narkotikëve, bazuar në informacione të siguruara në rrugë operative, kanë organizuar dhe realizuar kapjen e një shtetasi që posedonte lëndë narkotike.
Si rezultat i veprimeve profesionale policore, në rrugën “5 Maji” është arrestuar shtetasi D. C., 23 vjeç, banues në Dibër.
Gjatë kontrollit fizik ndaj tij, si dhe gjatë kontrollit të banesës, shërbimet e Policisë kanë gjetur dhe sekuestruar 1 kilogram e 54 gramë lëndë narkotike kanabis në trajtë xhelatine, me një vlerë të përafërt prej rreth 10 000 euro.
Nga hetimet paraprake dyshohet se lënda narkotike është trafikuar nga Kanadaja, ndërsa vijojnë hetimet për dokumentimin e plotë të kësaj veprimtarie kriminale dhe për identifikimin e personave të tjerë që mund të jenë të përfshirë.
Discussion about this post