Në 29 nëntor u ekzekutua Liridona Ademaj, një ngjarje që tronditi opinionin shqiptar jo vetëm në Kosovë. E ndërsa ka kaluar 1 muaj nga ekzekutimi i Liridonës, Policia e Kosovës ka arrestuar 4 persona, si të dyshuar për përfshirjen në vrasje, mes të cilëve edhe Naim Murselin, bashkëshortin e viktimës.
Vëllai i Liridonas, Leonard Ademaj përmes një postimi në Facebook, ka falënderuar mediat, shoqërinë civile, hetuesit, prokurorët, siç tha ai, që janë duke kontribuar në informim dhe në zbardhjen e rastit.
Postimi i plotë:
Ka kaluar një muaj që kur se është vrarë Liridona jonë.
Kishim shumë plane bashkë…
Këto ditë i gjetem në shtëpi ballonat që i pati ble me ia festu djalit ditëlindjen. Do t’i ruajmë ashtu siç e ruajmë çdo kujtim.
Viti 2023 do të mbetet për ne vit i kobshëm që na e mori Liridonën dhe vetëm shpresa për drejtësi po na mban gjallë.
Duam t’i falenderojmë të gjithë mediat, shoqërinë civile, hetuesit, prokurorët që janë duke kontribuar në informim dhe në zbardhjen e këtij krimi.
Ka pasur raste kur jemi lënduar rëndë nga diskutimet dhe raportimet që janë bërë rreth rastit, me informacione të pasakta. Ne shpresojmë që rastet e Liridonës dhe grave tjera të vrara të trajtohen me ndjeshmëri dhe kujdes më të madh.
Ne do të vazhdojmë të avokojmë për drejtësi për Liridonën.
Discussion about this post