Në kufijtë e anormales, Arabia Saudite ofron 100 mln euro për… emrin e Barcelonës

Sauditët kanë bërë një ofertë “anormale” për të përdorur emrin e Barcelonës, duke dhënë 100 milionë euro në vit.

“Prepotenca” e Arabisë Saudite në futboll është më shumë se ofenduese. Petrodollarët që ata kanë janë “të tepërta” dhe përpiqen të sigurojnë me to, çdo gjë që i shkon në mendje. Futbollistë, trajnerë, gjyqtarë, drejtues, gjithçka.

Për të rritur emrin e markës së kampionatit të tyre, ata i paraqitën një propozim të veçantë Barcelonës. Gjë që duket si një mundësi e madhe për katalanasit, veçanërisht në një kohë kur financat e tyre janë në pikë të hallit.

Liga e Arabisë Saudite, sipas një radioje katalanase, ka bërë një ofertë për të marrë hua emrin e Barcelonës.

Me fjalë të tjera, një skuadër në vend mund të përdorë emrin “FC Barcelona” dhe të konkurrojë me të. Sigurisht, kjo do të bëhet nëpërmjet kompensimit.

Siç theksuan në Barcelonë, propozimi është për 100.000.000 euro në vit Edhe për një klub si Barcelona,​​ janë shumë. Megjithatë, mbetet të shihet se çfarë përgjigje do të japë bordi i klubit katalanas.