Një pikë në Moldavi i ka mjaftuar kuqezinjve për të siguruar pjesëmarrjen në Euro 2024. Kur ka mbetur edhe një ndeshje, ajo e 20 nëntorit ndaj Ishujve Faroe, kuqezinjtë ndodhen në kuotën e 14 pikëve, në krye të Grupit E.
Ndeshja deçizive ajo ndaj Moldavisë, e luajtur në Kishinjau, ka përfunduar në barazim 1-1, ndërsa kuqezinjtë kanë dominuar takimin deri në minutën e 88-të kur moldavët barazuan rezultatin. Ekipi i Sylvinho kaloi në avantazh në minutën e 24 të takimit me një gol të realizuar nga Sokol Cikalleshi, me 11 metërsh.
Në ndeshjet kualifikuese në grup, Shqipëria ka humbur vetëm ndeshjen e parë, atë ndaj Polonisë në transfertë, për të nisur më pas një tjetër rrugëtim, duke dhuruar spektakël dhe fitore, veçanërisht në “Air Albania”.
Nga takimet e zhvilluara, kuqezinjtë kanë marrë 3 pikë me Poloninë, 4 pikë nga dy ndeshjet me Çekinë, 4 pikë nga dy ndeshjet me Poloninë, si dhe 3 pikë në transfertë ndaj Ishujve Faroe, me të cilët do të mbyllin edhe përballjet në fazën e grupeve në ndeshjen që do të luhet në Tiranë, në stadiumin “Air Albania”.
Një fitore në ndeshjen e fundit e bën Shqipërinë kryesuese të Grupit E, ndërsa kualifikimi tashmë është i vendosur dhe kuqezinjtë e drejtuar nga braziliani Sylvinho i bashkohen skuadrave që kanë siguruar tashmë kualifikimin për në Euro 2024.
Pikante nga ndeshje Moldavi-Shqipëri
90’+4’ Mbyllet ndeshja me barazimin 1-1 që siguron biletën për në Euro 2024!
90’+2’ Muja hyn në fushë në vend të Asanit.
90’ Jepen 4 minuta shtesë.
88’ Vjen goli i vendasve! Pas një harkimi në zonë është Baboglo i cili shënon golin e barazimit 1-1.
84’ Goditje dënimi e shkëlqyer e Asllanit, gjuajtja e tij devijohet mbi traversë nga portieri i vendasve.
80’ Gjasula merr vendin e Bajramit në radhët e kuqezinjve.
74’ Tjetër rast për të shënuar, me gjuajtjen e Bajramit nga jashtë zonës që nuk gjen trekëndëshin në të majtë të portierit.
73’ Mundësi e artë e kuqezinjve për të dyfishuar shifrat. Seferi nga e majta gjuan por gjen devijimin e portierit e më pas traversa i mohon gëzimin e golit. (VIDEO)
73’ Një harkim i rrezikshëm në zonën kuqezi spastrohet nga Ismajli i cili largon sferën në këndore.
69’ Motpan i lë vendin në fushë Damaskan në këto minuta të fundit.
67’ Vendasit shfaqen përsëri rrezikshëm me Nikolaeskun i cili ul topin për Postolakin, roveshata e këtij të fundit përfundon qetësisht në duart e Berishës. (VIDEO)
66’ Ramadani provon gjithashtu që të gjejë rrjetën me një gjuajtje nga jashtë zonës, pa gjetur katërkëndorin.
63’ Seferi nga e majta nis top për të sapofuturin në lojë, por ky i fundit nuk gjen devijimin para portës.
62’ Daku merr vendin e Cikalleshit në fushën e lojës
59’ Situata zhvendoset në anën tjetër ku Rata për fat gjuan jashtë nga një pozicion i favorshëm.
58’ Shqipëria kërkon golin e dytë me një kundërsulm por gjuajtja e Asanit devijohet dhe kontrollohet nga portieri i vendasve, teksa ka edhe protesta për një prekje topi me dorë. (VIDEO)
55’ Nikolaesku provon këtë radhë nga jashtë zonës, Berisha devijon në goditje nga këndi.
54’ Kajmakov ndëshkohet me karton të verdhë pas një faulli ndaj Asllanit.
51’ Një top i kthyer mbrapa nga Seferi kthehet në asist për Nikolaeskun i cili niset drejt portës, por ndalet nga Berisha.
50’ Vendasit mundohen të ushtrojnë trysni nga krahët, me futjen e një tjetër sulmuesi në lojë. Por tentativat nga krahët nuk funksionojnë pasi prapavija e Shqipërisë është e vendosur mirë dhe nuk lejon asnjë hapësirë.
48’ Seferi nga e majta provon me një gjuajtje nga jashtë zonës, sfera kalon mbi traversë.
46’ Pjesa e dytë nis me një ndryshim te Moldavia, teksa aktivizohet Kojoçaru në vend të Ravenko.
45’+2’ Mbyllet me avantazhin 1-0 të Shqipërisë pjesa e parë e takimit.
45’ Jepen 2 minuta shtesë.
44’ Goditje dënimi e vendasve që harkohet në zonë nga Rata, Nikolesku me kokë gjuan lehtë duke çuar sferën në duart e Berishës.
41’ Bajrami merr topin në gjysmëfushën tonë dhe pasi i afrohet me shpejtësi zonës kundërshtare lëshon në gjuajtje të fortë, që kontrollohet në dy kohë nga portieri vendas.
40’ Shumë faulle në këto minuta që ulin ndjeshëm ritmin e sfidës, gjë që u shkon për shtat kuqezinjve pasi ky rezultat siguron kualifikimin.
35’ Asani nga e djathta nis një top në qendër për Cikalleshin, por në vend të tij gjen mbrojtësit vendas të cilët largojnë rrezikun.
32’ Protesta të vendasve që kërkojnë penallti për një kontakt në zonë, por gjyqtaria bën shenjë për një faull të mëparshëm ndaj Mitajt.
31’ Shqipëria duket në kontroll të plotë, teksa ka qarkullim të gjatë të topit.
28’ Vendasit rrezikojnë me një goditje standarte, Berisha del dhe grushton topin mbi kundërshtarët.
25’ GOOOL SHQIPËRIA! Cikalleshi shënon me penallti!
24’ Penallti për Shqipërinë! Gjyqtari bën shenjë nga pika e bardhë pas një faulli ndaj Seferit në krahun e majtë të sulmit.
22’ Harkime radhazi në krahun e djathtë, vendasit largojnë me vështirësi.
19’ Pasime të shumta të futbollistëve kuqezi, por për momentin nuk ka hapësira për të rrezikuar katërkëndorin.
16’ Shkëndija e parë është e vendasve me Nikolaeskun i cili në të djathtën detyron me gjuajtjen e tij Berishën që të çojë topin në këndore.
14’ Qarkullim i gjatë i topit i kuqezinjve pranë zonës kundërshtare, duke kaluar nga e djathta në të majtën. Në fund është Asllani i cili provon nga jashtë zonës, por bllokohet nga mbrojtësit.
11’ Edhe Rata ndëshkohet me të verdhë për vendasit pas një faulli ndaj Ramadanit.
9’ Mitaj ndëshkohet me karton të verdhë për një faull ndaj Nikolaesku.
5’ Një harkim i rrezikshëm në zonë devijohet keq nga Gjimshiti që çon topin lart në ajër, por Berisha kontrollon me qetësi.
4’ Vendasit ngulmojnë në këto minuta për të mbajtur lojën pranë zonës tonë, me presing të lartë në krahun e Hysajt.
1’ Mitaj nis një pasim të gjatë në krah për Seferin, ky i fundit nuk ia del të shmangë pozicionin jashtë loje të vendasve.
1’ Nis dueli në Kishinau.
Discussion about this post