24 ditë dhe në Shqipëri ende ka vatra zjarri që janë aktive dhe po rrezikojnë banesat pranë. Të gjithë vendin po punohet për shuarjen e 10 vatrave masive të zjarrit, një pjesë e të cilave janë të reja dhe një pjesë janë favorizuar nga era e fortë.
Ditën e djeshme një vatër e re zjarri është shfaqur, nën ndikimin e erës në Malin e Tërbunit të Bashkisë së Pukës, e cila rrezikoi kurorën e qytetit, por nuk ka rrezik për banesa.
Prej një jave situata vazhdon të jetë e rënduar edhe në fshatin Patalej të Lezhës. Pasditen e së shtunës dhe gjatë së dielës, si pasojë edhe e erës, flakët kanë zgjeruar territorin e tyre edhe në fshatin Molung, i cili shtrihet në Bashkinë e Mirditës. Në këtë zonë janë djegur rreth 30 hektarë shkurre. Në terren ndodhen shërbimet zjarrfikëse, ushtria dhe shërbimi pyjor, ndërsa gjatë së dielës ka pasur ndërhyrje edhe nga ajri me anë të helikopterëve. Autoritetet thonë se flakët janë nën kontroll.
Flakët e zjarrit po përhapen me shpejtësi edhe në Verilindje të fshati Lalm të Lezhës dhe në Katund të Vjetër në zonën e Mirditës. Në këto fshatra nuk rrezikohen banesa. “Ka filluar ndërhyrjen nga ajri helikopteri çek për izolimin e zjarrit e më pas do të ndërhyhet me forca ushtarake e bashkiake për të bërë krehjen e plotë të perimetrit të vatrës, në mënyrë që të bëhet izolimi i plotë”, sqaron ministria. Era ka ndikuar në përhapjen e flakëve në fshatin Patalej, Njësia Administrative Kolsh, Bashkia Lezhë.
Gjithashtu, flakët kanë djegur edhe 140 hektarë kullota. Për shkak të terrenit të vështirë, ndërhyrja nga forcat zjarrfikëse nëpërmjet tokës është e vështirë, ndërsa në aksion për shuarjen e flakëve është angazhuar edhe një helikopter holandez. Edhe në këtë zonë kanë ndërhyrë Forcat e Armatosura në përpjekje për vënien nën kontroll të flakëve. Situatë problem- atike nga zjarri paraqitet edhe në fshatin Flet të Fushë-Arrëz- it. Prania e linjës së tensionit të lartë ka pamundësuar ndërhyrjen e helikopterit holandez, i cili ka ndërprerë punën për shuarjen e kësaj vatre zjarri.
