Presidenti i vendit Ilir Meta, ka qenë i ftuar nga komuniteti dibran, ku ka marrë pjesë ditën e sotme në festimet e organizuara në Pallatin e Kulturës në Kamëz, me rastin e 100-vjetorit të luftës së Dibrës.
Meta ka shpërndarë në rrjetin social “Facebook”, foto dhe video nga ceremonia festive, Meta thekson se lufta e Dibrës dhe beteja e lavdishme e Lanë-Lurës, luajnë një rol të rëndësishëm në mbrojtjen e trojeve shqiptare nga pushtuesit mizor serbë.
Ai madje shkruan se nuk ka gjë më të shenjtë dhe më të shtrenjtë se Sovraniteti, Integriteti dhe Pavarësia e Shqipërisë.
“Nder dhe kënaqësi e veçantë të merrja pjesë sot në takimin festiv të organizuar në Pallatin e Kulturës në Kamëz, me rastin e 100-vjetorit të Luftës heroike të Dibrës dhe betejës së lavidshme të Lanë-Lurës, për mbrojtjen e trojeve shqiptare nga pushtuesit mizorë serbë. Sot kjo ngjarje është një burim frymëzimi për të gjithë ne dhe veçanërisht për brezin e ri, që i mban gjallë traditat e të parëve dhe kujtimin e tyre të paharruar.
Një shekull më pas, burrëria, trimëria dhe heroizmi i patriotëve të Lurës dhe të Qarkut të Dibrës, na dëshmon se nuk ka gjë më të shenjtë dhe më të shtrenjtë se Sovraniteti, Integriteti dhe Pavarësia e Shqipërisë, për të cilën është derdhur aq shumë gjak dhe janë kryer aq shumë sakrifica sublime dhe të panumërta. I përjetshëm kujtimi i të gjithë patriotëve të Lurës dhe të Dibrës, të cilët me në krye Elez Isufin shpëtuan kufijtë e Shqipërisë!” – shkruan Presidenti Meta në facebook.
Në këtë takim i cili është organizuar nga Bashkia e Kamzës, ka qenë i pranishëm edhe kreu i saj Rakip Suli.
Discussion about this post