Sekretari Amerikan i Shtetit, Antony Blinken ka uruar Shqipërinë me rastin e 109 vjetorit të festës së Pavarësisë. Në një deklaratë zyrtare, Blinken kujton se miqësia mes dy vendeve daton më shumë se një shekull, kur Woodrow Wilson mbrojti pavarësinë e Shqipërisë në Konferencën e Paqes në Paris të vitit 1919, ndërsa rrezikohej copëtimi i mëtejshëm i territoreve.
“Në emër të Shteteve të Bashkuara të Amerikës, përgëzojmë popullin e Shqipërisë teksa festoni 109- vjetorin e Pavarësisë. Miqësia jonë e thellë dhe e qëndrueshme daton më shumë se një shekull nga koha kur Presidenti Woodrow Wilson mbrojti prerazi pavarësinë e Shqipërisë në Konferencën e Paqes në Paris të vitit 1919”, shkrun Blinken.
Sekretari i Shtetit kujton gjithashtu 30-vjetorin e rivendosjes së marrëdhënieve diplomatike që u shënua këtë vit, ndërsa shton se SHBA mbështet reformën në drejtësi dhe ekonomi.
“Në vitin 2021, ne shënuam 30 vjet të rivendosjes së marrëdhënieve diplomatike, duke reflektuar mbi gjithçka që amerikanët dhe shqiptarët kanë arritur së bashku që nga viti 1991. Sot ne jemi aleatë brenda NATO-s dhe vitin e ardhshëm do të shërbejmë së bashku në Këshillin e Sigurimit të OKB-së. Shtetet e Bashkuara janë të përkushtuara për të mbështetur institucionet demokratike të Shqipërisë, reformat në drejtësi dhe ekonomike dhe të ardhmen në Bashkimin Evropian”, shkruhet ndër të tjera në deklaratë.
Blinken e mbyll mesazhin duke theksuar se SHBA është krenare ta quajë vendin tonë, mik, aleat dhe partner.
Discussion about this post