Nënkryetarja e Partisë Demokratike Jorida Tabaku beson se pas Kuvendit të datës 18 demokratët do të jenë së bashku, pavarësisht se mendojnë ndryshe. Në një intervistë për mediat, Tabaku ftoi delegatët të shprehin çdo mendim kritik në Kuvendin e 18 Dhjetorit.
“Për PD është vlerë që ka mendime të ndryshme. Gjyshi im ka qenë i internuar në Savër të Kushnjës që unë të kem mendim ndryshe. Ajo që nuk e bëj vetë dhe nuk e pranoj nga të tjerët është gjuha e akuzave dhe e linçimit, por mendimi ndryshe është vlerë e jona, që nga themelimi i partisë. Kështu qe kushdo që ka një mendim ndryshe, ka hapësirë për ta thënë atë në Kuvendin e PD në 18 Dhjetor. Jam e sigurtë që PD është një forcë e madhe e politke dhe e vetmja forcë që mund të ndryshojë Shqipërinë” – tha Tabaku.
Tabaku gjithashtu tha se në 11 dhjetor zhvillohet një aktivitet i zotit Berisha me mbështetës të tij, ndërsa në datën 18 është Kuvend zyrtar, që ka fuqinë, legjitimitetin, bazuar mbi Statutin, që do të marrë vendime dhe që do të mbledhë bashkë të gjithë demokratët.
“Në 11 Dhjetor zhvillohet një aktivitet i zotit Berisha me mbështetës të tij. Askush nuk e mohon që ai ka mbështetës, anëtarë të PD. Në datën 18 është Kuvend zyrtar, që ka fuqinë, legjitimitetin, bazuar mbi Statutin, që do të marrë vendime, që do të mbledhë bashkë të gjithë demokratët. Një thirrje për t’u bërë bashkë në datën 18. Për datën 18 ka një konfirmim të jashtëzakonshëm. Do të jetë një Kuvend shumë i rëndësishëm i PD sepse do të përcaktojë strategjinë, rrugën, vizionin për vitet në vijim” – tha Tabaku.
Më tej ajo shprehet se situata që po kalon Partia Demokratike është më e vështira e 31 viteve që nga themelimi dhe se bisedon se demokratët do ta kalojnë këtë sfidë për hir të së ardhmes së PD dhe Shqipërisë.
“Besoj që vështirësitë e kësaj situate do të kalojnë dy javët në vijim, që janë shumë të rëndësishme për politikën shqiptare në përgjithësi dhe, në veçanti, për PD. Jam e sigurt që ekziston një brez i ri i jashtëzakonshëm politikanësh që nuk kanë frikë të ecin përpara. Besoj që PD, megjithatë vështirësitë, është në këmbë dhe do të jetë më e fortë. Luftën ne e kemi me Edi Ramën. Atë kemi kundërshtarin tonë, nuk kemi askënd brenda PD”. – u shpreh Jorida Tabaku.
Discussion about this post