Një ngjarje e rëndë kriminale ka ndodhur në qytetin e Shkodrës mëngjesin e sotëm, ku autori Ragip Gila, 29 vjeç, vrau dy persona dhe plagosi dy të tjerë. Ai mbërriti para një lokali pranë bashkisë me motor dhe hyri brenda me dy armë zjarri dhe i veshur me jelek antiplumb. Pa paralajmërim, hapi zjarr ndaj personave që ndodheshin në vendngjarje, duke shkaktuar një masakër të vërtetë. Pas të shtënave, ai u largua nga dera e pasme e lokalit dhe braktisi motorin, duke ecur në këmbë për disa metra.
Më pas, Gila ndaloi një qytetar dhe nën kërcënimin e armës i mori makinën BMW ngjyrë gri, me të cilën u largua me shpejtësi nëpër rrugët e qytetit. Pamjet filmike tregojnë qartë momentin kur ai qarkullon me makinën e vjedhur në përpjekje për t’u arratisur. Arriti deri në lagjen Skënderbeg, por gjatë ndjekjes nga forcat e policisë, u përfshi në një aksident duke u përplasur me disa mjete të tjera. Pas përplasjes, e braktisi automjetin dhe tentoi të largohej në këmbë në drejtim të lumit Kir.
Përpjekja për t’u fshehur nuk zgjati shumë, pasi ai u kap nga forcat “Shqiponja” pranë lumit. Nga sulmi me armë humbën jetën Armando Pali dhe Liridon Kraja (i njohur edhe si Lushi), ndërsa të plagosur mbetën Erogen Brajoviç (Vaso) dhe kamerierja 25-vjeçare e lokalit. Ngjarja ka tronditur Shkodrën dhe opinionin publik në mbarë vendin, ndërsa policia po vazhdon hetimet për zbardhjen e plotë të rrethanave dhe motivit të krimit.
Discussion about this post