Ish gardisti, Martin Nikolli, pjesë e grupit të shoqërimit të kryeparlamentares Lindita Nikolla, ka dëshmuar në polici pas sherrit të ndodhur ditën e djeshme në Hamallaj.
Mësohet se përpara oficerëve të policisë, Nikolla ka thënë se ka qenë babai i djëmve të familjes Kaçi ai që i ka ofenduar.
Më tej ai thekson se ka qëlluar në ajër me armë për të ndaluar sherrin që po agravonte.
“Erdhi babai i palës tjetër dhe na ofendoi. Konflikti ka nisur në fillim nga ana e tyre. Mës pas gjërat u përkeqësuan dhe nisi konflikti më i rëndë. Në fund kam qëlluar me armë në ajër. Qëllimi ka qenë për të ndaluar sherrin dhe konfliktin që kishte nisur.
Nxora armën për të qëlluar në momentin që sherri po degradonte deri në përdorim të sendeve dhe objekteve të forta.”- tha ai.
Kujtojmë se ditën e djeshme, pas një sherri masiv për rrugën, dy familjet në Hamallaj Nikolla e Kaçi u përfshinë në një konflikt me shkopa bejsbolli e armë. Si pasojë e këtij konflikti u plagosën 3 persona.
Ngjarja ndodhi paraditen e djeshme në lagjen e Hidrovorit mes familjes Nikolla dhe familjes Kaçi.
Martin Nikolli, punonjës i Gardës, qëlloi me armën e shërbimit në ajër, por fatmirësisht nga të shtënat nuk është lënduar askush. Menjëherë, Ministria e Brendshme e ka përjashtuar nga Garda, ndërsa AMP (Agjencia e Mbikëqyrjes Policore), e ka arrestuar për tre vepra penale, “Kanosja”, “Plagosja e rëndë me dashje” dhe “Prishja e qetësisë publike”. Po ashtu në pranga është vënë edhe vëllai i tij, Alfred Nikolli, 46 vjeç.
Ka qenë Pjetër Kaçi, 80 vjeç, kryefamiljar i familjes Kaçi, i cili po kalonte në rrugën e lagjes kur Martin, Alfred, Petrit dhe Arben Nikolli i kanë zënë rrugën duke i thënë pse na sheh dhe pas këtij debati e kanë goditur të moshuarin.
Discussion about this post