Ditët e para të muajit gusht kanë sjellë fluks në pikat kufitare të vendit. Emigrantët shqiptarë që jetojnë dhe punojnë në vendet fqinje po kthehen në Atdhe për të kaluar pushimet.
Kjo fundjavë ka arritur pikun e kalimeve në portin e Durrësit. Këtë të shtunë në portin më të madh të vendit mbërritën 5 tragete me 6 mijë persona dhe 2500 automjete.
Autoriteti portual ka vënë në dispozicion 32 sportele për të shmangur vonesat.
Që nga 1 korriku 62 mijë persona janë futur në Shqipëri përmes portit të Durrësit. Risi këtë vit është përdorimi i këtij porti nga shumë qytetarëve të Bashkimit Europian, që kanë zgjedhur Shqipërinë për të kaluar pushimet.
Fundjava që përkon me nisjen e pushimeve të emigrantëve shqiptarë në Greqi ka rritur numrin e personave që hynë edhe në pikën kufitare të Kapshticës.
Rreth 3500 persona kalojnë kufirin këto dite çdo 24 orë në Kapshticë. Që prej datës 1 Gusht nga kjo pikë kufitare kanë hyrë për në Shqipëri rreth 17 mijë qytetarë.
Pavarësisht fluksit në të dyja anët e kufirit nuk ka pasur radhë dhe vonesa ne kryerjen e procedurave. Pala shqiptare punon me 3 sportele ne dalje dhe 3 ne hyrje, ndërsa pala greke punon me 2 sportele ne dalje dhe 2 ne hyrje.
Nga piken doganore te Qafe Thanës prej 1 gushtit kanë hyrë në territorin shqiptar rreth 22 mijë persona, shumica e tyre vijnë për të kaluar pushimet në Shqipëri.
Në të dyja anët e kufirit punohet me kapacitet maksimal sportelesh dhe personeli për të përballuar fluksin, çfarë ka shmangur pritjet dhe radhët në kufi.
Discussion about this post