116 të burgosur në Ekuator kanë humbur jetën dhe 80 të tjerë u plagosën pas përplasjeve me grupet e bandave rivale. Presidenti i Ekuadorit, Guillermo Lasso, ka shpallur gjendje të jashtëzakonshme në sistemin e burgjeve, pas një beteje në mesin e të burgosurve.
Zyrtarët, të cilët kanë fajësuar bandat e lidhura me kartele ndërkombëtare të drogës, kanë thënë se të paktën pesë të vdekurve u është prerë koka në përleshje në Guayaquil.
Presidenti Lasso e ka shpallur gjendjen e jashtëzakonshme më 29 shtator, duke thënë në një konferencë për media se ajo që ka ndodhur është e dhimbshme, ndërsa nuk dha siguri se autoritetet kanë nën kontroll situatën.
“Është për keqardhje që burgjet janë duke u kthyer në territore për përleshje mes bandave kriminale”, ka thënë ai, duke shtuar se do të veprojë për të fituar kontrollin e burgut dhe të parandalojë përhapjen e dhunës edhe në burgje tjera.
Ledy Zuniga, ish-presidente e Këshillit Kombëtar të Ekuadorit për Rehabilitim, ka thënë se në historinë e këtij shteti të Amerikës Jugore, nuk është raportuar asnjëherë një incident i shkallës së tillë nëpër burgje.
