Pak ditë më parë plasi skandali ku në Durrës u kap një kontejner me banane, ku brenda tyre kishte 119 kilogram kokainë. Ditën e sotme është zbardhur itinerari i kontejnerit me banane. Lënda narkotike u gjet brenda një magazine në zonën e Vaqarrit, ndërsa sipas panorama.al, e cila citon burime nga grupi hetimor, kontejneri ka shëtitur në të paktën gjashtë porte dhe i janë dashur plotë 52 ditë për të mbërritur në destinacion, në Portin e Durrësit.
Mësohet se kontejneri me banane, ishte nisur nga porti Bolivar (Ekuador) me datën 5 nëntor 2021 dhe mbërriti pas 52 ditësh më Portin e Durrësit, konkretisht me datë 26 dhjetor të vitit të kaluar.
“Kontejneri është nisur në datën 5 nëntor nga porti i Bolivarit dhe një ditë më pas (6 nëntor), është transferuar në portin e qytetit të Guayaquil. Kontejneri ka qëndruar disa ditë në portin e Guayaquil dhe është nisur drejt portit të Rodman në Panama. Nga porti i Rodman, anija me kontejnerin është zhvendosur në portin e Colon, po në Panama. Në këtë port, kontejneri është gjurmuar në datën 23 nëntor, pra 18 ditë pasi u nis nga porti i Bolivarit në Ekuador. Nga porti i Colon në Panama, kontejneri është nisur drejt Italisë dhe mbërriti pas 14 ditësh (7 dhjetor) në portin e Gioia Tauro në Italinë Perëndimore. Ndalesa e radhës dhe e fundit ishte porti i Durrësit, ku kontejneri mbërriti me 26 dhjetor, pas plotë 52 ditësh nga nisja në Ekuador”, konfirmuan burime nga grupi hetimit. Kontejneri ka dalë nga Porti i Durrësit për t’u depozituar në magazinat e kompanisë së importit të bananeve në Tiranë dy ditë pas mbërritjes, konkretisht në 28 dhjetor.
Discussion about this post