Aktori francez, Gérard Depardieu, është akuzuar shpesh për sjellje të pahijshme me koleget femra. Por së fundmi, uebfaqja investigative franceze, Mediapart, ka publikuar rezultatet e një ekzaminimi njëmujor të veprimeve të Depardieu përgjatë një periudhe gati 20-vjeçare.
Raporti, i cili përmban dëshmi nga 13 gra, pretendon raste të shumta të komenteve të turpshme, përkëdheljeve dhe veprimeve të papërshtatshme nga Depardieu në televizione dhe filma të profilit të lartë, duke përfshirë serialin Netflix Marseille, filmin biografik të periudhës Dumas dhe komedinë Big House.
Vetë Depardieu nuk pranoi të komentonte, por avokatët e Depardieu mohuan shkeljen e ligjit. Firma ligjore me bazë në Paris, Cabinet Temime tha se ata mendonin se raporti bazohej në “vlerësime shumë subjektive dhe/ose gjykime morale”.
Sjellja e supozuar e aktorit duket se ka përfshirë kryesisht prekjen dhe përkëdheljen e padëshiruar të aktoreve të reja femra, artisteve të grimit dhe vajzave të kastit, si dhe komente të turpshme dhe “zhurma të vazhdueshme rënkimi”.
Ylli i kinemasë franceze ka një reputacion jo fort të mirë, kur është fjala për sjelljen, ndërsa afrimiteti me Rusinë është kritikuar shpesh edhe nga admiruesit e tij.
Në vitin 2018, aktorja Charlotte Arnould ngriti akuza për përdhunim kundër mikut të babait të saj, duke pretenduar se ai e kishte sulmuar dy herë seksualisht. Çështja po vazhdon ende nëpër gjykatat franceze, pas një përpjekjeje të pasuksesshme të Depardieu për të rrëzuar akuzat.
Regjisorët dhe producentët kanë vazhduar ta punësojnë atë, pavarësisht polemikave të tilla, dhe vitin e kaluar Depardieu u shfaq në pesë filma, duke përfshirë një version të ri të serialit detektiv Maigret.
Discussion about this post