Shprehja “pas çdo të keqeje, prit një të mirë”, duket se i shkon shumë mirë Entela Çanos, supervizores së punimeve ndërtimore, Entela Çano.
Ajo fiton një tender me vlerë mbi 110 milionë lekë të vjetra nga Autoriteti Rrugor Shqiptar (ARRSH) për supervizimin e punimeve në Tunelin e Llogarase, saktësisht në të njëjtën ditë që merret e pandehur nga Prokuroria e Posaçme në përfundim të një hetimi për “shkelje të barazisë në tendera” e “falsifikim dokumentash”, ku personazhi kryesor ishte kryebashkiaku i Ersekës, Erion Isai.
ARRSH-ja, mesa duket ka tentuar të zbusë disi dhimbjen e sipërmarrëses së “A&E Engineering”, e cila rezulton një nga “klientet” kryesore të institucionit shtetëror për supervizimin e rrugëve.
“Boldnews.al” konsultoi të dhënat e përpunuara në portalin e specializuar për transaksionet e Thesarit, “open.data”, nga ku rezulton se studioja e saj ka përfituar plot 6 milionë euro nga tenderat publikë, vetëm për periudhën 2019-2025.
Tenderat e supervizimit konsiderohen si “procedurat bisht” të kontratave gjigante për ndërtimin e rrugëve. Por, gjithësesi këto “bishtat e vegjël”, nuk duket se kanë qenë edhe aq të vegjël për “A&E Engeneering” të Entela Çanos.
“Ylli” i Erion Isait (Çuçkës)
Në 26 Shtator 2025, Prokuroria e Posaçme (SPAK) mori të pandehur kryebashkiakun e Kolonjës, Erion Isai. Prokurorët kanë vendosur në shpinën e Isait, i njohur edhe si “Çuçka” që prej kohësh kur ishte pjesë e emisionit cabaret “Portokalli”, disa akuza të rënda për një zyrtar publik: “Shpërdorim detyre”, “Korrupsion pasiv dhe aktiv”, “Fshehje të pasurisë” dhe “Shkelja e barazisë së pjesëmarrësve në tendera apo ankande publike”.
Prokuroria ka hetuar të paktën dy procedura tenderuese, njëra që lidhet me punimet shtesë për rrugën Korçë-Ersekë dhe një për ndërtimin e një ujësjellësi në zonat rurale të Kolonjës.
Nga dosja hetimore kanë rrjedhur disa komunikime telefonike mes Çuçkës dhe Entela Çanos, të cilat lidhen me tenderin e ujësjellësit.
Një detaj interesant në ato biseda është fakti që Çuçka i drejtohet kontraktores Çano me emërtime përkëdhelëse, duke treguar afërsi dhe bashkëpunim të ngushtë mes të dyve.
“Je yll…”, “Sa më shpejt, pls..” janë disa nga frazat e sheqerosura të kryebashkiakut Isai për supervizoren private, Entela Çano. Megjithatë, thelbi i bisedave, të konsideruara me element abuzive nga SPAK-u, janë detajet që lidhen me hartimin e termave të tenderit për ujësjellësin rural, përpara se procedura të shpallej nga Bashkia e Kolonjës.
Prokuroria e Posaçme thotë se, në përfundim të hetimit, ka marrë të pandehur Erion Isain, Entela Çanon, si edhe disa zyrtarë të tjerë në bashkinë e Kolonjës.
Miliardat publike për Entela Çanon
Kompania “A&E Engineering” rezulton të jetë krijuar në vitin 2007. Objekti i aktivitetit të saj është “Shërbime në planifikim urban, projektim, plane të detajuara për zona të rëndësisë kombëtare, projektim, mbikqyrje, kolaudim, etj”.
Entela Çano është ortake themeluese e studios së projektimit dhe aktualisht është pronare e vetme e saj.
Nga një vështrim në tenderat publikë, rezulton se “A&E Enginering” e Entela Çanos është një përfituese e rregullt e tenderave të zhvilluar nga Autoriteti Rrugor Shqiptar për mbikqyrjen dhe supervizimin e punimeve në akse të ndryshme rrugore kombëtare e lokale.
Në pesë vitet e fundit, “A&E Engineering” rezulton të ketë arkëtuar mbi 180 milionë lekë të reja ose rreth 2 milionë euro vetëm nga Autoriteti Rrugor Shqiptar.
Një institucion tjetër shumë i rëndësishëm për studion e Çanos është Bashkia e Tiranës. Gjatë periudhës që institucioni është drejtuar nga Erion Veliaj, studioja “A&E Engineering” ka përfituar gjithashtu rreth 2 milionë euro.
Ndërkohë, në Bashkinë Ersekë rezulton se ka fituar rreth 30 mijë euro, shumë që lidhet pikërisht me supervizimin e ujësjellësit rural, për të cilin tashmë është marë e pandehur, së bashku me kryebashkiakun Erion Isai (Çuçka). Boldnews.al
Discussion about this post