Nga hetimi i Llogarasë në Alpet e Zvicrës, Balluku i bën “karshillëk” SPAK-ut

Zv/kryeministrja Belinda Balluku, e marrë në hetim nga SPAK për shkelje të barazisë në tendera, duket se ka gjetur mënyrën perfekte për t’i shpëtuar “stresit të hetimit”: një udhëtim me tren nga Zyrihu në Bernë.

Në një video të postuar në rrjetet sociale, Balluku shfaqet e qeshur, duke shijuar pamjet e Zvicrës, ndërsa SPAK përgatitet për fletëthirrjen e saj.

“Me skuadrën e MIE dhe Hekurudhës Shqiptare në një udhëtim me tren për takimin bilateral me homologun zviceran të Transportit, Energjisë dhe Mjedisit”, shkruan Balluku.

Metoda duket e ngjashme me atë të ish kryebashkiakut Erion Veliajt, i cili gjithashtu tentoi të shmangte hetimet me një “pushim publik”.

Hetimi i SPAK ka nisur pas dyshimeve për paracaktim fituesi në tenderin për mbikëqyrjen e punimeve të Tunelit të Llogarasë. Ky tender, i shpallur në dhjetor 2021 me fond limit rreth 2 milionë euro, lidhet me skualifikimin e kompanive “Staki Eltidi” dhe “Gjeokonsult & CO”, duke lënë rrugën e lirë për bashkimin e kompanive “Hill Internacional N.V” dhe “Net-Group”.