Katër anëtarë me origjinë shqiptare të një grupi të krimit të organizuar janë dënuar gjithsej me 62 vite burg pasi tentuan të kontrabandonin 139 kilogramë kokainë me vlerë prej 11 milionë paund në Britani të fshehur në një ngarkesë banane.
Autorët me origjinë shqiptare po ndiqen penalisht, Robert Balli, 59 vjeç, Mirgent Shahu, 32, Arman Kaviani, 37 vjeç dhe Florjan Ibra, 30 vjeç, pas një hetimi nga Agjencia Kombëtare e Krimit (NCA).
Autorët u akuzuan të gjithë për vepra të importimit të kokainës. Balli, 59 vjeç, nga Cheshire, organizoi një kompani transporti për të marrë dhe transferuar kontejnerët në një kompani magazinimi në Coventry.
Kontejneri kishte mbërritur nga Ekuadori dhe u kontrollua në portin e Londrës, Gateway. Këto lëvizje u vëzhguan nga oficerët e NCA, raporton Shërbimi i Prokurorisë së Kurorës.
Balli, së bashku me bashkëpunëtorët Florjan Ibra, Mirgent Shahu dhe Arman Kaviani, mbërritën disa ditë më vonë, më 15 prill 2022. Ball dhe Shahu u dhanë udhëzime Kavianit dhe Ibrës në oborrin e magazinimit. Ata hapën kamionin duke përdorur një levë dhe filluan të shkarkonin paketat që besonin se përmbanin drogë, por ndërsa e bënë këtë, NCA dhe oficerët e policisë ndërhynë për t’i arrestuar. Kaviani dhe Ibra tentuan të arratiseshin, por u kapën.
Balli dhe Shahu u dënuan nga një juri në Warwick Crown Court më 26 maj të këtij viti, ndërsa Ibra dhe Kaviani u deklaruan fajtorë në një seancë të mëparshme. Në të njëjtën gjykatë Ball dhe Shahu u dënuan me nga 18 vjet burgim, ndërsa Ibra u dënua me 13.5 vjet burg dhe Kaviani me 12 vjet e nëntë muaj në seancat e mëparshme.
Discussion about this post