E nisi thjesht duke u frymëzuar nga kampionët e tij të preferuar në televizor dhe më pas arriti të bëhej një i tillë. Ky është Andri Saraçi, 15-vjeçari nga Fieri i cili që tani ka një titull kampioni dhe medalje ari në peshëngritje.
Me ëndrra të mëdha dhe me një ambicie për t’u lavdëruar, që në një moshë të re Andri gjente mënyrat e tij për të kryer stërvitjet, qoftë edhe në kushte të vështira.
“E nisa me dy gira në shtëpi pastaj u thashë prindërve të më sillnin në stërvitje.”
Por sot, edhe pse midis shumë sfidash, në 5 vite, talenti 15-vjeçar ka marrë pjesë në 4 gara me të rriturit dhe 1 me të rinjtë ku doli edhe kampion për moshat U 17.
Edhe pse ndoshta nuk zgjodhi rrugën e bashkëmoshatarëve, të cilët ndjekin futbollin, Andri vendosi të ndjek ëndrrat e tij, duke dhënë shumë shpejt prova se është në vendin e duhur.
Trajneri Riza Fejzullahu thotë se stërvitja e Andrit ka qenë intensive dhe se është kombinuar me pasionin e 15-vjeçarit për këtë sport.
Pasi ka korrur fitore të rëndësishme, 15-vjeçari ka projektuar të ardhmen e tij në këtë sport.
Sportistët e klubit të Apolonisë stërviten në mjedise të improvizuara dhe të papërshtatshme pasi Fierit vazhdon t’i mungojë një pallat sporti.
