Në kuadër të javës së trashëgimisë kulturore europiane, 150 fëmijë të shkollave 9-vjeçare dhe të mesme të qytetit të Beratit, të veshur me kostume popullore të trevave të Beratit dhe të gjithë Shqipërisë, kanë elektrizuar mbrëmjen në qytet.
Ata kanë performuar me këngë e valle për rreth 2-orë në Pedonale, ndërkohë që aktiviteti është ndjekur nga qindra qytetarë e turistë. Së bashku me trupat popullore të Beratit, Lushnjes, Skraparit, Fierit dhe Kuçovës në shesh kanë performuar edhe vallet tradicionale të të gjitha trevave shqiptare si dhe këngë popullore e polifonike.
Për kryebashkiakun e Beratit, Ervin Demo ky aktivitet ka një rëndësi të veçantë sepse synon përçimin e vlerave të trashëgimisë kulturore beratase e më gjerë.
“Është e rëndësishme trashëgimia jonë dhe vlerat që ajo përçon sepse kur flasim për trashëgiminë kulturore, brezi i ri duhet jo vetëm t’i mbarti këto vlera, por edhe t’i përçojë ato në të ardhmen, brez pas brezi”, ka thënë Demo.
Ky eveniment i organizuar nga shkollat e qytetit të Beratit, AADF, BID dhe nën mbështetjen e bashkisë Berat, do të mbahet mend jo vetëm nga vetë fëmijët që për herë të parë u veshën me kostume popullore, por dhe nga qytetarët, që shijuan një natë magjike nën tingujt e muzikës dhe paradës së fëmijëve në Pedonale.
