Partia Demokratike ka reaguar sërish lidhur me publikim e pagave të mbi 600 mijë shqiptarëve që punojnë në sektorin publik dhe privat.
Ish-deputeti Endri Hasa ka deklaruar se të dhënat personale u vodhën për të vjedhur zgjedhjet dhe se sipas tij, 160 mln euro janë harxhuar në 8 vjet për sigurinë e sistemeve të të dhënave.
“Edi Rama mund të përpiqet të mashtrojë shqiptarët me fjali të tilla se sot e tutje do t’i kushtojë më shumë vëmendje sigurisë së sistemeve të të dhënave personale, por e vërteta është ndryshe. Shqiptarët duhet të dinë se me taksat e tyre kanë paguar disa institucione që kanë për detyrë të ruajnë të dhënat e tyre. Në këto 8 vjet Agjencia Kombëtare e Shoqërisë së Informacionit, Autoriteti Kombëtar për certifikimin elektronik dhe Sigurinë Kibernetike kanë shpenzuar mbi 160 milionë euro. Këto para janë paguar për të vetmin qëllim, që të dhënat e qytetarëve shqiptarë të jenë të sigurta”, tha Hasa.
Sipas ish-deputetit, Rama është përpjekur ta zvogëlojë skandalin, por sipas tij, asnjë ndjesë hipokrite, nuk mund ta mbulojë të vërtetën e përdorimit të të dhënave personale vetëm që Rama të merrte një mandat të tretë.
Gjithashtu, ai shtoi se në një vend normal kryeministri do të kishte dhënë dorëheqjen, kërkesë që u përsërit edhe ditën e djeshme nënkryetari i kësaj partie, Enkelejd Alibeaj, por Rama po vazhdon punën i pashqetësuar.
Discussion about this post