Banorë të Moravës në Berat po zhvillojnë protestë për kompensimin e tokave bujqësore, pasi do tu merren për rikonstruksionin e fushës së aviacionit.
Para mediave, ata u shprehën se nuk do ndalen derisa të marrin kompensim me çmimin e duhur për tokat bujqësore pasi e konsiderojnë si qesharak atë të vënë nga Ministria e Mbrojtjes.
“Kemi investuar mundin e gjithë jetës tonë. 2 milionë e 30 mijë lekë të vjetra kompensim është tallje për ne. Ne do protestojmë para Ministrisë, Ambasadës amerikane derisa toka të na vlerësohet me çmimin e tregut në këtë zonë. Me 2 milion dynym-in, është çmim qesharak. Nipërit dhe mbesat e mia ku t’i çoj? Jashtë shtetit? Moj të na marrin dhe shtëpitë, ama paratë i duam! Kam qenë emigrant në Greqi, shkule thotë, ku të vete me 2 milionë lekë të vjetra. Për serat nuk ka asnjë dëmshpërblim. Ngrehu na thonë, por unë nuk lëviz, jemi mbi 200 familje. Duam dhe përfaqësuesit e NATO-s të na vijnë këtu”, thanë banorët.
Ata i kanë dërguar një shkresë të dytë Ministrisë së Mbrojtjes por ende nuk u është kthyer përgjigje.
Discussion about this post