Gjatë orëve të fundit të ditës së sotme janë finalizuar dy operacione për goditjen e veprimtarisë kriminale të dhënies ndihmë shtetasve të huaj, për kalim të paligjshëm të kufirit.
Gjatë operacionit policor të koduar “District 3” u arrestua në flagrancë shtetasi V. K., 62 vjeç, që ndihmonte 5 emigrantë, për të kaluar kufirin në mënyrë të paligjshme.
“Në kuadër të operacionit policor të koduar “District 3” u bë arrestimi në flagrancë i shtetasit:V. K., 62 vjeç, për veprat penale “Ndihma për kalim të paligjshëm të kufijve” dhe “Fshehja e të ardhurave”. Ky shtetas kishte strehuar në ambientet e hotelit që administronte, në rrugën “Kastriotët”, 5 emigrantë që kishin hyrë në mënyrë ilegale në Shqipëri, të cilëve iu kishte premtuar, kundrejt shpërblimit monetar, dhënien ndihmë për transportimin e tyre drejt pikave të kalimit kufitar”.
Ndërkohë nga ana tjetër, në operacionin policor të koduar “District 4”, u arrestua në flagrancë një shtetas tjetër me iniciale A. E., 32 vjeç , që ndihmonte 7 emigrantë, për të kaluar kufirin në mënyrë të paligjshme. Në ambientet e hotelit ku kishte strehuar emigrantët e paligjshëm, u gjetën dhe u sekuestruan një armë zjarri pistoletë, krehër dhe municion luftarak.
“Në kuadër të operacionit policor të koduar “District 4” u bë arrestimi në flagrancë i shtetasit: A. E., 32 vjeç, për veprat penale “Ndihma për kalim të paligjshëm të kufijve”, “Fshehja e të ardhurave” dhe “Mbajtja pa leje dhe prodhimi i armëve, armëve shpërthyese dhe i municionit”. Ky shtetas kishte strehuar në hotelin që administronte, në rrugën “Kastriotët”, 7 emigrantë që kishin hyrë në mënyrë ilegale në Shqipëri, të cilëve, kundrejt shpërblimit monetar, iu kishte premtuar dhënien ndihmë për transportimin e tyre, drejt pikave të kalimit kufitar. Gjatë kontollit të ushtruar në njërën nga dhomat e këtij hoteli, janë gjetur dhe sekuestruar në cilësinë e provës materiale, një armë zjarri pistoletë, krehër dhe municion luftarak”.
Në vijim të veprimeve u proceduan penalisht të 12 emigrantët e paligjshëm, për veprën penale “Kalimi i paligjshëm i kufirit shtetëror”.
Discussion about this post