Një fëmijë 2-vjeçar humbi jetën tre ditë më parë teksa po transportohej në spitalin e Burrelit, nga çerdhja, ku kishte shfaqur problemet shëndetësore.
I mituri nuk arriti të shpëtojë, ndërsa shkaku i vdekjes së 2-vjeçarit, mbetet ende enigmë, për faktin se as mjekët nuk arrijnë të gjejnë se çfarë i ka ndodhur fëmijës.
Babai i të miturit, në një rrëfim për emisionin ‘Me zemër të hapur’ në News24, thotë se djali i tij nuk kishte asnjë problem me zemrën, duke hedhur poshtë dyshimet e pasqyruara edhe në media.
“Ai ishte i qete dhe nuk kishte probleme shëndetësore. Djali pati një viroze të lehte dhe kishte ditë që e kishte kaluar. E çuam në çerdhe shumë mirë.
Edukatorët na thanë se pas gjumit djali kishte vjellë.
Ai humbi ndenjat në çerdhe dhe ndërroi jetë rrugës për në spital. Atë ditë nuk ishte i sëmurë, madje nuk vuante as nga zemra”, tha babai.
Pas ngjarjes mjekë të spitalit të Burrelit thanë se do të ishte autopsia ajo që do të zbulonte shkakun e vdekjes së fëmijës së mitur. Ndërkohë që Prokuroria ka nisur një hetim lidhur me ngjarjen, që vijon të mbetet mister. Policia reagoi pas ngjarjes, duke dhënë detaje se fëmijës së mitur ishte tentuar ti jepej ndihmë duke u transportuar nga dy edukatore drejt spitalit, por për shkak të gjendjes së rënduar, ai kishte mbërritur pa shenja jete në spital.
Discussion about this post