Tre persona janë arrestuar pasi akuzohen se kanosën një 36-vjeçar, që t’iu jepte 20 000 euro, për të mos i publikuar materiale filmike intime një 36-vjeçari.
“Në kuadër të operacionit ‘Shtrëngimi’ u ekzekutuan urdhrat për ndalimin e shtetasve A.M., 29 vjeç dhe M.Sh., 26 vjeçe, si dhe më datë 24.10.2024, u arrestua në flagrancë, duke i marrë paratë 36-vjeçarit, shtetasi S.S., 23 vjeç”, njoftoi policia.
“Nga hetimet dyshohet se 3 shtetasit e kanë kanosur 36-vjeçarin, që t’iu jepte 20 000 euro, në mënyrë që ata të mos i publikonin fotografi dhe video me përmbajtje intime”, shtuan të njëjtat burime.
Të dyshuarit akuzohen për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Hetimi, sipas bluve, është kryer me metoda proaktive nga Sektori për Hetimin e Krimeve ndaj Pasurisë në Drejtorinë për Hetimin e Krimeve të Rënda në Departamentin e Policisë Kriminale, në bashkëpunim me Prokurorinë e Tiranës.
Discussion about this post