Sot shënohen 34 vite nga rrëzimi i shtatores së ish-diktatorit Enver Hoxha në sheshin “Skënderbej”. Në shkurt të vitit 1991, mijëra studentë u nisën nga “Qyteti Studenti” drejt qendrës së Tiranës për të rrëzuar shtatoren e Hoxhës.
Rrëzim, i cili simbolizonte rënien e regjimit që po jetonte ditët e fundit të tij. Fillimisht pati përleshje mes të rinjve dhe policisë dhe më pas arritën ta rrëzonin monumentin e ish-diktatorit. Pas rrëzimit, shtatorja u tërhoq zvarrë me një nga makinat e Ministrisë së Brendshme, që ndodheshin të parkuara aty pranë.
Ky zhvillim erdhi pas grevës së urisë në të cilën u futën studentët dhe protestave të tyre.
Shpallja e pluralizmit politik, në dhjetor të vitit 1990, u pasua me themelimin e partive politike, të cilat përgatiteshin për të hyrë në garën e të parave zgjedhje pluraliste në Shqipëri, pas sundimit 45-vjeçar të diktaturës komuniste.
Kuvendi Popullor doli me një dekret më 23 janar 1991 që parashikonte respektimin dhe mbrojtjen e monumenteve që lidhen me historinë kombëtare dhe simbolet shtetërore, ku përfshihej busti i Enver Hoxhës.
Sipas dekretit, dënohej me 6 muaj deri në tri vjet burg ai shtetas që dhunonte monumente kulture, siç ata i quanin bustet e figurave të shquara, nga Skënderbeu e deri tek Enver Hoxha. Por kjo nuk i ndaloi mijëra studentë e qytetarë që të ngriheshin për të shembur simbolin e komunizmit, shtatoren e Enver Hoxhës.
Discussion about this post