21 janari, Manja paralajmëron “prova të reja”: SPAK të nisë hetimet

Ministri i Drejtësisë, Ulsi Manja paralajmëroi “prova të reja” për atë ç’ka ndodhi më 21 Janar 2011.

Në një deklaratë për mediat nga kryeministria, Manja e quajti ngjarjen një krim shtetëror.

“Shumë prova mund të dalin në dritë nga një hetim i gjithanshëm për 21 Janarin”, theksoi Manja, ndërsa kërkoi nga SPAK të nisë hetimet kryesisht pas një audio-regjistrimi të publikuar në media një ditë më parë. “Duket qartësisht kush janë urdhëruesit dhe ekzekutorët e 21 janarit”, tha ai.

I pyetur pse kërkohet tani nga drejtësia një hetim për ngjarjen e 21 Janarit 2011, kur kanë kaluar 12 vite nga vrasja e katër protestuesve në bulevardin para kryeministrisë, Manaj tha se është pikërisht tani momenti kur drejtësia, sipas tij, është e pavarur.

“PS vërtet ka në pushtet prej 10 vitesh, por në bëmë reformën në drejtësi, i dhamë shqiptarëve një drejtësi të re të pavarur dhe presim që ajo të bëjë drejtësi për 21 janarin. Nuk heton qeveria, por drejtësia. Drejtësia e djeshme hezitonte të merrej me 21 janarin. SPAK dhe drejtësia e re duhet ti japin përgjigje 21 janarit, janë në sprovë”, tha Manja.