Kryeministri Edi Rama u shpreh sot se Gjykata e Të drejtave të Njeriut me vendimin e saj për 21 janarin, rrëzoi procesin farsë që u zhvillua në Shqipëri lidhur me ngjarjen.
Nga Dibra, ku morri pjesë në Asamblenë e Zgjeruar të PS-së, Rama tha se duhej të ishte gjykuar zinxhiri i komandimit dhe këtu nuk bëhet fjalë se cili nga plumbat vrau e nuk vrau.
“U qëlluan pafundësisht plumbash ndaj protestuesve që nuk paraqisnin rrezik për askënd. U vranë qytetarë nga pushkët e shtetit, si pasojë e një zjarri të komanduar nga maja e zinxhirit”, tha Rama.
Ai u shpreh se jo vetëm nuk pati drejtësi, por pati një poshtërim ndaj familjeve të viktimave.
“Drejtësia mund të vonojë, por drejtësia nuk harron. E kam thënë vite më parë që 21 janari është një nga ato krime që mund të ndodhë se vonesa e drejtësisë mund të jetë më e gjatë se drejtësia e vonuar, por është një nga ato krime që kurrën e kurrës nuk mbeten pa ndëshkuar.
Është një krim shtetëror, është një krim me urdhër të drejtpërdrejtë qeverie. Ky vendim është një tjetër kulm në një rrugë të re që sapo është hapur për drejtësinë në Shqipëri”, tha Rama.
Kryeministri tha se tashmë në Shqipëri nuk ka individë të pandëshkueshëm. “Këtë hap historik mund t’ia mundësonte Shqipërisë dhe shqiptarëve vetëm Partia Socialiste e Shqipërisë”, tha Rama.
Ai e konsideroi si arritjen më të madhe reformën në drejtësi.
“Njerëz që deri dje dukeshin të paarritshëm, sot janë të gjithë të prekshëm dhe miti i pandëshkueshmerisë është rrëzuar. Në Shqipëri nuk ka individë të pandëshkueshëm. Kjo duhet që të bëjë krenarë cdo anëtarë të kësaj familje politike, sepse këtë hap historik në gjithë rrugëtimin e këtij vendi që kur ngriti flamurin e pavarësisë mund tja mundësonte vetëm PS.
SPAK nuk erdhi as nga hëna as nuk erdhi nga Amerika dhe as nga BE. SPAK erdhi nga ajo nevojë e madhe për drejtësi, të cilën e mori përsipër ta adresojë PS. Kjo reformë nuk do bëhej dot nëse nuk do kishim mbështetjen e aleatëve tanë, SHBA. Por ama SHBA dhe BE në Shqipëri kanë qenë që në 1991, nuk kanë ardhur në 2013 as 2023. Nëse kjo do ishte çështje e një prodhimi të gatshëm që vjen me avion do e kishin sjellë me kohë”, tha Rama.
Discussion about this post