Nga 22 mijë maturantë që kanë aplikuar në universitet në këto 6 ditë të para dhe janë regjistruar mbi 40% e tyre. Ndërkohë që universitetet publike janë më të preferuarat e maturntëve, pasi mbi 85% e tyre janë regjistruar në programet që ofrohen prej tyre.
Kreut të Rrjetit Akademik Shqiptar, Arjan Xhelaj ka thënë se interesimi i maturantëve ka qenë i lartë dhe që disa degë janë drejt ezaurimit të kuotave që në ditët e para.
“Kemi mbi 9000 maturantë që tashmë e kanë bërë zgjedhjen e tyre dhe janë regjistruar në programet e studimit që ata kanë kërkuar. Regjistrimet mbyllen në datën 15 Shtator. Kanë përfunduar regjistrimet në masën 100% në dy programe studimi, Sporte dhe një kuotë e mbetur regjistrimi në Mjekësi e Përgjithshme. Një ecuri të mirë duhet thënë që ka Teknologjia e Informacionit, Infermieria në universitetet rajonale po shkon drejt ezaurimit, ka një ecuri shumë të mirë. Universiteti me regjistrimet më të mëdha momentalisht është ai i Tiranës, Mjekësia dhe Bujqësori. Në rrethe, regjistrimin më të lartë e ka pasur universiteti i Durrësit, ndjekur nga Elbasani dhe Shkodra” – u shpreh Arjan Xhelaj.
Raundi i dytë i aplikimeve për t’u bërë pjesë e garës në universitet nis më 19-21 Shtator. Të drejtën të hyjnë në garë, veç atyre që nuk kanë fituar ndonjë preferencë në raundin e parë do të hyjnë dhe ata që dhanë me sukses provimet e maturës në Vjeshtë.
