Brenda një dite janë bërë 3 denoncime për një tender të Ministrisë së Shëndetësisë. Tashmë dihet që kjo ministri mban numrin më të lartë të tenderëve dhe koncesioneve, ku pjesën më të madhe të tyre e ka në shkelje të ligjit. Këtë gjë tregojnë denoncimet që janë bërë brenda një dite ndaj Manastirliut. Bëhet fjalë për të njëjtin tender, por i ndarë në disa lote, ku sigurisht secili lot ka kontratë më vete dhe fond të derdhur në veçanti. Ajo që del nga denoncimet është se për çdo lot MSH po nënshkruan kontrata në shkelje të ligjit.
Ankesat e dorëzuara sot në Komisionin e Prokurimeve Publike janë saktësisht për lotin 6 dhe për lotin 9. Për këtë të fundit me objekt “Pajisje kardiake për monitorimin e pulsit, ritmit dhe tensionit” janë dorëzuar 2 ankesa. Në njërën nga ankesat e dërguara nga kompania O.E.S DISTRIMED, e cila pretendon se QSUT ka vendosur në dokumentin e tenderit kritere shtesë të cilat kufizojnë konkurrencën dhe përjashtojnë automatikisht disa kompani. Sipas ankimuesit, disa nga kërkesat janë të panevojshme në lidhje me shërbimin që kërkohet dhe kufizojnë prodhuesit gjithashtu.
“Në specifikimet e deklaruara kërkohet që pajisja të ruaje të dhënat në një memorie te quajtur Compact Flash Memory Card, gjithashtu të ketë lexuesin përkatës të kësaj karte në PC. Kjo lloji karte memorie është e një teknologjie shumë të vjetër 1994 dhe sot ka shume variante për karta memories si SD card, microSD card, memorie të brendshme të pajisjes që arrijnë në disa GB memorie. Ne aspektin funksional te pajisjes nuk ndikon fare lloji i kartës së përdorur, madje përdorimi i një teknologjie të vjetër si Compact Flash Memory Card i kufizon mundësitë e pajisjes për të regjistruar”, thuhet në dokument.
Ankesa tjetër për lotin 9 ka ardhur për kontratën me vlerë 5 milionë lekë dhe objekt “Pajisje kardiake për monitorimin e pulsit, ritmit dhe tensioni”. Ankimuesi është “BIOMETRIC ALBANIA”, i cili sikur rasti më lartë shprehet se, në tender kërkohen specifikime të panevojshme për një pajisje, të cilat sjellin kufizime dhe përjashtime joligjore. Pasi, pajisja që garuesit ofrojnë e kryen shërbimin në mënyrë të mbrojtur, pa patur nevojë për një pajisje shtesë sikur kërkohet në tender.
“Duke u nisur nga komunikimet që kemi patur me partnerë të ndryshëm ndërkombëtarë të cilat janë kompani prodhuese prestigjioze me eksperience shumëvjeçarë në tregun e pajisjeve të kardiologjisë, (si ECG, Regjistrues/Analizues Holter Ritmi, Presioni etj), gjykojmë se specifikimi i mësipërm nuk është i nevojshëm për një pajisje siç është Regjistruesi Holter EKG.
Për me tepër, nuk rezulton të këtë ndonjë studim klinik apo protokoll që ta klasifikojë këtë funksion si një parametër domethënës dhe të nevojshëm përsa i përket regjistruesve ambulatore te EKG”, thekson ankimuesi.
Denoncohet kontrata 18 mln lekë
Ankesa tjetër për QSUT ka ardhur nga kompania “MSE” për lotin 6 të tenderit, me objekt “Kabineti i Endoskopisë”. Ankimuesi shprehet se, nga njohja me dokumentet standarde të tenderit dhe konkretisht me Specifikimet Teknike te
produkteve, vërehet qe specifikimet e kërkuara janë diskriminuese dhe disa prej tyre nuk plotësohen prej asnjërit nga markat lider në treg për këtë produkt, duke sjell kështu automatikisht skualifikimin e një pjese të mirë të operatorëve ekonomik prezent ne treg, te cilët mund te ofertojnë sisteme me te mira dhe me një çmim me konkurrues. Pra, kompanitë e interesuar dalin garant se mund të ofrojnë shërbimin e kërkuar nga QSUT me një çmim më të lirë, por kriteret burokratike të vendosura në tender i pengojnë.
Sipas ankimuesit, është absurde që në tender vendoset si kriter metrat fikse se sa duhet gjatësia e shtratit, duke skualifkuar kështu kompanitë që mund të ofrojnë shërbim të mirë me kosto të ulët, vetëm pse shtrati është 2 mm më i shkurtër apo i gjerë. “Specifikimi: Gjatësia e shtratit duhet të jetë jo me e vogël se 1900 mm dhe gjerësia e shtratit jo me pak se 500 mm: Vlera fikse e kërkuar e gjatësisë së shtratit është kufizuese për shume operator të cilët përmbushin të gjithë specifikimet e kërkuara”, thuhet në ankesë. Kompania në fjalë shprehet se ky kriter diskriminues është vendosur edhe për disa pajisje të tjera, duke bërë që operatorët më të mirë në treg të përjashtohen automatikisht. Se cila kompani do të përmbush këto kritere burokratike dhe diskriminuese që ka shpikur Manastriliu me shokë, do ta shohim ditën që do të mbyllet tenderi dhe shpallet fituesi.
Tashmë dihet se këto janë skemat që ndjek zakonisht Manastirliu, që në fund t’i jap tenderin një nga kompanive të saj mike, duke u justifikuar se ofertuesit e tjerë nuk plotësonin kushtet. Gjithsesi, na mbetet të shohim vendimin që do të marrë KPP për këto ankesa, që në të vërtet paraqesin të njëjtin shqetësim.
Discussion about this post