23-vjeçari shqiptar u kap në fermën e kanabisit, lihet në burg

Një 23-vjeçar është dënuar me 1 vit burg në Angli pasi u kap në një fermë kanabisi. Visar Verçani kishte hyrë ilegalisht në Britaninë e Madhe duke marrë para borxh.

23-vjeçari ka deklaruar para gjykatës se ai kërkonte të shlyente borxhin ndaj trafikantëve përmes kultivimit të kanabisit.

Verçani u arrestua kur policia ekzekutoi një urdhër kontrolli në një prej shtëpive në Station Road West, Station Trimdon, më 24 qershor. Gjatë kontrollit, policia gjeti 145 bimë në faza të ndryshme të rritjes së tyre, shkruajnë mediat britanike.

Sipas avokatit mbrojtës, Verçani kishte hyrë ilegalisht në Britaninë e Madhe ku kishte kërkuar edhe azil por kërkesa e tij ishte refuzuar.

Shqiptari u justifikua se i kishte hyrë kësaj rruge pasi kërkonte që të shlyente borxhin e marrë prej 21 mijë paundësh dhe të nxirrte shpenzimet e jetesës.

Sipas avokatit mbrojtës, 23-vjeçari rezulton pa precedent të mëparshëm penalë. Megjithatë, gjykata e la në burg duke e dënuar me 1 vit heqje lirie.