VMRO-DPMNE kërkoi dorëheqjen dhe përcaktimin e aftësisë së kryeministrit të Maqedonisë së Veriut Dimitar Kovaçevski. Me këtë, siç tha deputeti i kësaj partie, Dragan Kovaçki, do të konstatohet nëse ka gënjyer apo është vërtet i paaftë përgjithmonë.
“Maqedonia udhëhiqet nga një kryeministër i paaftë ose një kryeministër që ka gënjyer dhe ka dorëzuar një dokument për të shmangur detyrimin ligjor për të shërbyer në armatë. Paaftësia e përhershme është një gjendje që vetëm mund të përkeqësohet, jo të përmirësohet. Nëse do të mund të korrigjohej gjendja e dezertorit Kovaçevski, atëherë diagnoza do të ishte i paaftë përkohësisht, e jo i paaftë përgjithmonë siç thuhet”, deklaroi Kovaçki.
Sipas VMRO-DPMNE-së kryeministri është i detyruar të japë dorëheqjen menjëherë, pasi me paaftësi të përhershme njeriu nuk mund t’i kryejë detyrat e punës gjatë ditës pa ndërprerje dhe duhet t’i nënshtrohet pushimeve, të cilat mund të jenë më të gjata.
Po ashtu nga partia e Mickoskit theksojnë se duhet së paku t’i kërkojë falje popullit maqedonas, sepse ai u bë kryeministër duke qenë i paaftë dhe kur shteti e kërkonte dhe kishte nevojë për të.
Discussion about this post