Kreu i Grupit Parlamentar të PS-së, Taulant Balla ka ironizuar kryedemokratin Sali Berisha pas lajmit se Britania e Madhe ka vendosur të shpallë “non grata” 27 zyrtarë shqiptarë. Në fjalën e tij në Kuvend, Balla thekson se Britania e Madhe ecën në një linjë me SHBA-të dhe se një nga zyrtarët e penalizuar nga ky shtet do të jetë dhe ish-kryeministri Berisha. Kreu i Grupit Parlamentar të PS-së, i kujton Berishës në Kuvend nëse mund ta kalojë dot Kanalin Anglez, “La Manche”.
“Qasja e njëjtë e Britanisë së Madhe pas shpalljes nongrata të SHBA-ve. Unë jam këtu për ta përshëndetur vendimin e fundit të MB. E cila në një kuadër të luftës globale anti-korrupsion ka njëhësuar listën e shpallur nga SHBA dhe natyrshëm që pyetja që shtrohet në këto raste është për njërin në fund të sallës. Mirë Atlantikun me not nuk e kalove dot, La Manche e kalon dot me not?” -tha Balla.
Britania e Madhe ka bërë të ditur sot, me anë të një deklarate të fortë, se vendi do të marrë masa ndëshkuese për individë në Shqipëri që kanë lidhje me krimin dhe korrupsionin.
“Të ndërpresim lidhjen mes politikës, biznesit dhe aktivitetin e paligjshëm në Ballkanin Perëndimor, “është titulli i një deklaratë të gjatë të përgatitur nga i dërguari special i kryeministrit britanik në Ballkanin Perëndimor Sir Stuart Peach.
Discussion about this post