Sot shqiptarët anembanë botës festojnë me krenari 113-vjetorin e shpalljes së Pavarësisë së Shqipërisë, një nga ngjarjet më madhore dhe më domethënëse të historisë sonë kombëtare. Më 28 nëntor 1912, Ismail Qemali ngriti flamurin kuqezi në qytetin e Vlorës, duke shpallur lindjen e shtetit shqiptar pas gati pesë shekujsh sundim osman. Ky akt historik përfaqësoi kulmin e përpjekjeve të gjata të shqiptarëve për liri, identitet dhe vetëvendosje.
Në Kuvendin e Vlorës morën pjesë 83 delegatë të ardhur nga të gjitha trevat shqiptare, të cilët përfaqësuan interesat dhe aspiratat e popullit. Prej tyre, 40 firmosën Aktin e Pavarësisë, një dokument themelor që sanksionoi formimin e shtetit të ri.
Menjëherë pas shpalljes së pavarësisë, Asambleja e Vlorës krijoi Qeverinë e Përkohshme të Shqipërisë së Pavarur, me Ismail Qemal bej Vlorën si kryeministër, ndërsa u ngrit edhe Pleqësia si organ këshillimor që ndihmoi në hapat e parë të organizimit të shtetit.
Përpjekjet për pavarësi u mbështetën edhe nga kryengritjet e vitit 1912, të cilat i treguan shteteve ballkanike dhe Fuqive të Mëdha se shqiptarët ishin të vendosur të krijonin shtetin e tyre.
Ismail Qemali, njëri nga figurat më të ndritura politike të kohës, punoi me ngulm për njohjen ndërkombëtare të Shqipërisë, megjithëse sfidat e brendshme dhe presionet e jashtme e detyruan të jepte dorëheqjen nga drejtimi i Qeverisë së Përkohshme më 22 janar 1914, duke ia kaluar pushtetin Komisionit Ndërkombëtar të Kontrollit. Ai u largua më pas drejt Italisë, ku ndërroi jetë në rrethana të paqarta më 24 janar 1919.
28 Nëntori ka një simbolikë të dyfishtë në historinë shqiptare, pasi pikërisht në këtë datë, në vitin 1443, Gjergj Kastrioti Skënderbeu ngriti flamurin shqiptar në Krujë, duke nisur epokën e rezistencës së gjatë kundër Perandorisë Osmane. Për këtë arsye, Dita e Flamurit është një bashkim i dy momenteve vendimtare që formësuan identitetin kombëtar shqiptar.
Sot, në të gjitha qytetet e Shqipërisë, Kosovës dhe në të gjitha vendet ku jetojnë shqiptarë, zhvillohen aktivitete festive, ceremoni zyrtare, homazhe dhe koncerte që nderojnë Pavarësinë dhe flamurin kuqezi.
Në Vlorë, qendra historike e kësaj dite, mbahet ceremonia kryesore, ndërsa institucionet kulturore dhe shkollat organizojnë ekspozita, tubime dhe veprimtari kushtuar figurave të Rilindjes Kombëtare. Flamuri shqiptar valëvitet në çdo shtëpi dhe shesh, duke simbolizuar krenarinë, bashkimin dhe aspiratat e përbashkëta të kombit.
Për shqiptarët kudo ndodhen, 28 Nëntori nuk është vetëm një ditë festive, por një moment reflektimi mbi sakrificat e paraardhësve tanë dhe mbi rrugën që shteti shqiptar ka bërë drejt zhvillimit dhe integrimit europian.
Kjo datë mbetet një monument i kujtesës sonë kombëtare dhe një motivim për të ardhmen, duke na kujtuar se liria dhe pavarësia janë vlera që duhen mbrojtur dhe nderuar gjithmonë.
Discussion about this post