Ministrja e Shëndetësisë Ogerta Manastirliu, ka zhvilluar ditën e sotme një takim me Task-Forcën dhe operatorët turistikë në Golem, për masat e sezonit turistik.
Manastirliu tha se brenda muajit maj synohet përfundimi i vaksinimit për punonjësit turistikë.
“Janë kryer 4 mijë vaksinime në të gjithë rrjetin e turoperatorëve dhe do të vijojnë me intensitet të shtuar për të garantuar ruajtjen e shëndetit. Brenda muajit maj do të vijojmë të përfundojmë vaksinimin e punonjësve në strukturat akomoduese”, tha Manastirliu.
Më tej ministrja e Shëndetësisë tha se vaksinimi është i rëndësishëm për të garantuar një sezon turistik më të lehtësuar, por zbatimi i protokolleve kundër Covid duhet të respektohet.
“MSh po përgatitet për mbarëvajtjen e të gjithë sezonit. Ky sezon do të ketë në komponentët e tij edhe hapjen e qendrave shëndetësore verore. Do të hapen 28 qendra shëndetësore verore ku parashikohen të ketë pika turistike. Programi i dezinfektimit po ashtu është shumë i rëndësishëm. Në 28 maj përfundon faza e parë e dezinfektimit për gjatë gjithë bregdetit”, tha Manastirliu.
