3-vjeçarja gjendet e vdekur në lavatriçe, prindërit darkonin

Një ngjarje e rëndë u shënua mbrëmjen e djeshme në Paris, ku një vajzë 3-vjeçare u gjet e pajetë brenda lavatriçes në shtëpinë e saj.

Sipas Le Parisien, prokuroria ka nisur një hetim për dy prindërit e saj, pasi dyshohet se mund të kenë lidhje me vdekjen e vajzës së tyre.

Ngjarja e rëndë ndodhi në verilindje të Parisit. Dy prindërit po darkonin në shtëpi së bashku me njërin prej fëmijëve të tyre.

Pas disa minutash, ata u shqetësuan për 3-vjeçaren dhe nisën të kërkojnë në shtëpi dhe jashtë banesës. Ishte babai që e gjeti vogëlushen brenda lavatriçes.

Pavarësisht se njoftoi ambulancën, vogëlushja nuk arriti dot të mbijetojë. Mediat franceze raportojnë se shkak i vdekjes dyshohet të jetë bërë mbytja.

Kjo për shkak se dera e lavatriçes ishte e mbyllur, por makineria nuk ishte e ndezur. Është ende e paqartë se si vogëlushja arriti të futej brenda në lavatriçe e më pas të mbyllej dera.

Duke u nisur nga këto dyshime, prokuroria ka nisur një hetim edhe për prindërit e saj.