Presidenti Ilir Meta i është drejtuar përmes një shkrese zyrtare Kolegjit të Posaçëm të Apelit, ku kërkon nisjen e procedimit disiplinor për anëtaren e gjykatës Kushtetuese Fjona Papajorgji për shkelje të rënda profesionale dhe etike që sipas kreut të shtetit cënojnë figurën e gjyqtarit kushtetues.
Në shkresë, Meta i referohet vendimit për zgjedhjet e 30 qershorit, ku Kushtetuesja vendosi të rrëzojë kërkesën e Shoqatës së Bashkive, për shpalljen e tyre si antikushtetuese.
“Pas shqyrtimit të të gjithë dosjes gjyqësore që na është përcjellë nga Gjykata Kushtetuese, rezultojnë disa të dhëna e fakte që bëjnë të detyrueshme t’ju përcjellim këtë informacion të shoqëruar me prova bindëse të cilat konfirmojnë se, ka të dhëna mëse të mjaftueshme se një gjyqtar i Gjykatës Kushtetuese dhe konkretisht zonja Fiona Papajorgji dhe relatore e kësaj çështje ka konsumuar shkelje të rënda profesionale dhe etike që diskreditojnë pozitën dhe figurën e gjyqtarit gjatë ushtrimit të mandatit. Përsa rezulton në dosje ekziston dyshimi ynë se në këtë veprimtari në kundërshtim me kërkesat e ligjit nr. 8577/2000, mund të jenë përfshirë edhe disa anëtarë të tjerë të Gjykatës Kushtetuese, shkruhet në njoftim.
Kujtojmë se Gjykata Kushtetuese hodhi poshtë kërkesën e Shoqatës së Bashkive për shpalljen të pavlefshme të zgjedhje lokale të 30 qershorit, ku opozita nuk mori pjesë.
Discussion about this post