Nga Lutfi Dervishi- 78 vjet pas përfundimit të Luftës së Dytë Botërore, dhe në prag të Luftës së Tretë Botërore, Kiko habitet nga një fakt që tepër sfidues:: si ndodh që vitet ikin, dekadat treten dhe veteranët në Shqipëri shtohen?!
Aritmetika dhe logjika i thotë se një njeri që ka qenë 12 vjeç në ditën e çlirimit të Shqipërisë sot është 90 vjeç. Megjithatë grupet e veteranëve me gjoksin e dalë – a thua se të gjithë ishin nga Vlora- dhe të zbukuruar me dekorata nuk krijuan trafik në rrugë. Si çdo vit r mbushën ekranet e televizioneve dhe dëftuan lutën e madhe.
Në gjithë vendet e botës veteran quhet personi që ka marrë pjesë në luftë. Por mesa duket në Shqipëri titulli veteran është i trashëgueshëm, brez pas brezi. Në një vend që rritet numri i dëshmorëve, çfarë problemi ka të rritet edhe numri i veteranëve?!
Përveç çështjes së veteranëve Kiko nuk arrin të kuptoj se si është e mundur që më patritotë shfaqen ata që kanë ikur nga Shqipëria; diplomatë që mbarojnë misionin jashtë Shqipërisë dhe kërkojnë azil në vendet ku kanë shërbyer, ish oficerë që jetojnë në Itali dhe Gjermani dhe një grup historianësh që vetëm kanë gënjyer për gjithçka. Të jetë malli për mëmëdheun apo ka diçka të mistershme te patriotët shqiptarë?
Sipas anektimit të shpallur në facebook Kikos i rezultoi se festën e çlirimit e festuan më të ngazëllyer shqiptarët që jetojnë në Gjermani. “Na ka parë Zoti”.
Në vend të dytë renditeshin një kategori shqiptarësh që ende jetojnë në Shqipëri; mjekë, infermierë, sanitarë, fizioterapist, muratorë, hidraulik, elektriçist, shoferë kamioni, që edhe pse ditë feste vijuan me intensitet të plotë mësimin e gjermanishtes në pritje që për mot të festojnë edhe ata në Gjermani.
12 mijë shqiptarë të tjerë, që gjatë 9 muajve të parë të këtij viti kaluan la Manshin, për t’i ardhur në ndihmë Britanisë për shkak të periudhës së vështirë që po kalon pas daljes nga BE- festuan deri në agim çlirimin e Shqipërisë me thirrjen: “o sa mirë me qenë shqiptare oe oe”.
Megjithatë çudia më e madhe ndodhi kur Kiko pyeti një grup të rinjsh që po ndiqnin në sheshin Skënderbej, koncertin e Dua Lipës. Pyetja ishte e thjeshtë, pa djallëzi. Po të dinte pasojat, Kiko kurrsesi nuk do ta bënte pyetjen: kur është çliruar Shqipëria? Një grup thonin se është çliruar më 28 nëntor, një grup tjetër këmbëngulte për datën 29 nëntor. Debati u nxeh aq shumë sa po të mos ndërhynte një turist gjerman që kishte ardhur për të ndjekur koncertin, sherri mund të kishte pasoja edhe më të rënda…
Megjithatë duhet shënuar se policia ndërhyri me shpejtësi dhe i vendosi sherrxhinjtë në dy furgona të ndryshëm. Nga të dy furgonat e policisë, dhuratë e qeverisë gjermane, dëgjohej një mallkim: “Mos shkofsh në Gjermani, brez pas brezi”
Discussion about this post