45 të arrestuar për trafik droge, Gjykata lë në burg 37 prej tyre, 5 “arrest shtëpie”, 3 i liron

Gjykata e Elbasanit ka caktuar “arrest në burg” për 37 nga 45 të arrestuarit për trafik droge, në kuadër të operacionit ‘Rrjeti’, ndërsa ka caktuar 5 masa sigurie “arrest shtëpie” dhe 3 “detyrim paraqitje”. Kujtojmë se, në kuadër të operacionit ‘Rrjeti’ në Elbasan, u goditën 4 grupe kriminale që trafikonin drogë. Mes 52 personave të përfshirë në këtë veprimtari kriminale janë: Igli Merko, Denis Darzeza, Ahmet Kushi, Gavrosh Berati, Florenc Demiri, Arsen Vishkulli, Erist Skilja dhe Emirjan Dinja, të cilët dolën zbuluar nga agjenti i autorizuar me simbolin ‘K’ që blinte drogë dhe zbuloi se si e kryenin shitjen e lëndëve narkotike. Ata shpërndanin lëndë narkotike të llojit kokainë, heroinë, ekstazi dhe kanabis që e përpunonin dhe e përgatisnin në doza të vogla, gati për shitje. Lënda narkotike shitej në forma të ndryshme, dikush me letra si të paketave të cigares, një tjetër në shishe uji, apo edhe në materiale plastike.