Pas 5 ditësh i bllokuar në minierë në Bulqizë është gjetur trupi i pajetë i minatorit Muharrem Plaku. Forcat e shpejta dhe minatorët kanë gjetur trupin e pajetë të Muharrem Plakut, i cili u bllokua në një prej galerive të kromit pas shembjes së një masivi minerali. 60-vjeçari punonte si zjarrmëtar në firmën ‘KADURTEX’ të vëllezërve Duriçi.
Një ditë më parë, për shkak të shirave të dendur, ka pasur një tjetër shembje masive 450 metra thellësi në minierën ku dyshohet ishte bllokuar 60-vjeçari. Muharrem Plaku ndodhej brenda galerisë së minierës në Bulqizë që nga mesdita e 15 shtatorit. Ekipet e kërkim-shpëtimit hasën vështirësi në gjetjen e tij për shkak të terrenit te vështirë.
Për ngjarjen e rëndë sindikata e minatorëve akuzoi strukturat shtetërore për angazhim qesharak në gjetjen dhe shpëtimin e Muharrem Plakut.
“Shteti dhe mobilizimi i institucioneve shtetërore ka qenë qesharak, edhe pse kanë kaluar më shumë se 3 ditë. E gjithë vëmendja është përqendruar te parlamenti i ri i padrejtësive të vjetra. Asnjë fjalë nuk kanë thënë për minatorin Muharrem Plaku. Bëjmë thirrje që shteti të kthejë sytë nga Bulqiza dhe të përqendrojë të gjitha forcat për nxjerrjen e shokut tonë nga nëntoka. Jeta jonë duhet të jetë më e rëndësishme se fitimi i pronarëve dhe pallavrat e politikanëve!”, thuhej në reagimin zyrtar.
Kjo është një ngjarje e rëndë, por për fat të keq e përsëritur. Instancat përkatëse nuk kanë marrë masa për të siguruar jetën e minatorëve që punojnë në kushte të vështira dhe me paga të ulëta.
