Një nënë e dy fëmijëve në Durrës, rezulton e humbur prej 6 ditësh. Janë familjarët të cilët kanë denoncuar rastin dhe ngrenë dyshime se ajo mund të jetë rrëmbyer. I vëllai tregon se e motra kishte marrë kushërirën në telefon disa ditë pas zhdukjes dhe i kishte treguar se 4 burra e kishin rrëmbyer, ndërsa kishte kërkuar që të shihte për herë të fundit fëmijët e saj, por telefonata kishte zgjatur vetëm pak sekonda dhe më pas celulari dilte i fikur.
Gjitjashtu ditën e enjte Aureta i ka dërguar të vëllait në aplikacionin ‘Whatsapp’, dy foto ku ajo shfaqej duke marrë serum e shtrirë në një krevat spitali. Këto pamje të së motrës, ai i ka denoncuar sërish në polici, teksa ka kërkuar të bëhet lokalizimi i saj.
Vëllai i saj, Ilirjan Cauli tregon se motra e tij, Aureta Cauli ishte larguar nga puna ditën e hënë, ku kishte punuar vetëm 2 orë dhe më pas ishte larguar me pretendimin se kishte seancën e divorcit në Pogradec. Ajo kishte marrë në telefon kushërirën e saj dhe i kishte kërkuar që të njoftonte nënën e saj, për t’i marrë një fëmijë nga çerdhja dhe tjetrin nga shkolla. Kjo ka qenë dhe biseda e fundit telefonike e Auretës, në dijeninë e familjarëve, pasi më pas telefoni i saj rezultonte i fikur.
Familja e saj pritën dy ditë me shpresën se ajo do të shfaqej, por kur panë që kjo gjë s’po ndodhte, ata iu drejtuan stacionit të policisë në zonën e Plazhit ku depozituan denoncimin për humbjen e saj. Ata tregojnë se kanë denoncuar në polici disa ditë më parë zhdukjen e saj, e tani po e bëjnë rastin publik edhe në media me shpresën se nëna e dy fëmijëve do të gjendet. Gruaja e humbur identifikohet si Aureta Cauli, teksa vëllai i saj rrëfen se ajo ishte në proces divorci.
Përballë kësaj situate, i vëllai i Auretës, nënës së dy fëmijëve që rezulton e zhdukur, akuzon organet kompetente për mosveprim në kohë.
Discussion about this post