Partia Demokratike prezantoi zyrtarisht kandidatin për kryetar të bashkisë së Dibrës, Luan Haka, propozuar nga strukturat e degës së PD dhe miratuar nga kryesia.
Prezantimi i Hakës, është bërë nga Sekretari i Përgjithshëm i PD, Gazment Bardhi, nënkryetarja, Jorida Tabalu, drejtuesi politik i qarkut, Xhelal Mziu, kryetari i degës së Dibrës, Naim Gazidede, deputetë si dhe anëtarë të kryesisë së PD.
Bardhi dhe Tabaku vlerësuan figurën e kandidatit Luan Haka, duke shprehur bindjen se Dibra do të fitohet e do tu kthehet qytetarëve, ndërsa vetë Haka deklaroi se ndjehet i privilegjuar që iu dha besimi për të kandiduar dhe nesër, shërbyer qytetarëve dibranë.
“Jam plotësisht i bindur që së bashku do ta ndërtojmë Dibrën tonë. Dibrën e vjedhur, Dibrën e masakruar, Dibrën e varfër e të harruar. Dibrën, të cilës, ja kam shkelur çdo pellëmb, ja di hallet, jetoj në të, dhe di çfarë i duhet asaj. Modestisht, nëse ka diçka për të cilën do ja dija vlerë vetes si kryetar i ardhshëm i Bashkisë, është fakti se ndryshe nga ata që i sjellin nga Tirana e që Dibrës ja mësojnë rrugët vetëm kur ju vjen pushteti, unë di dhe cepin më të harruar të saj, qytetarin më të paushqyer, e rrugën më të pashkelur. Jam më se i vendosur që së bashku nëpërmjet meritokracisë dhe përkushtimit, Bashkia do të jetë derë e hapur për gjithësecilin që dëshiron dhe ka çfarë t’i japë vendit dhe shoqërisë dibrane. Demokratët dinë të jenë vetëm të bashkuar”, u shpreh Haka.
Discussion about this post