Këshilli Bashkiak i Tiranës, me votat e këshilltarëve socialistë, miratoi vendimin e paraqitur nga Kryebashkiaku Erion Veliaj, për të kaluar një fond prej 600 mln lekësh te inceneratori i Tiranës.
Kjo shumë është e barabartë me pagesat e prapambetura që Bashkia e Tiranës ka ndaj inceneratorit. Veliaj e argumentoi vendimin me pastërtinë që duhet të ketë qyteti, madje u shpreh se kryeqyteti nuk mund t’u lihej zhulanjosëve.
Dhe si për të justifikuar pagesën për një incenerator që ndodhet në sekuestro preventive nga SPAK, megjithëse nuk ekziston fare, Veliaj paraqiti në Këshill një tabelë ku sipas tij tregoheshin pagesat që ka bërë Bashkia e Kavajës, e drejtuar nga një kryebashkiak demokrat pikërisht për inceneratorin.
“Ne do të shkojmë me kostum, kurse këta të Kavajës shkuan me tanga dhe bënë pagesën”, tha Veliaj.
Kryebashkiaku i Tiranës nuk dha shpjegime para Këshillit se nga dilnin këto para që do të derdhen për inceneratorin, por më pas një prej këshilltarëve të opozitës, tedi Blushi, zbuloi se 420 mln lekë hiqeshin nga fondi i arsimit për fëmijët e Tiranës dhe 180 mln të tjera nga fondi i emergjencave.
Përtej çdo debati lidhur me incerenatorin, për të cilin SPAK ka nisur hetimet, ajo që ndodhi në mbledhjen e Këshillit ishte shfaqja e rradhës që Erion Veliaj tregoi para Parlamentit të qytetit, duke iu shmangur çdo lloj llogaridhënieje apo debati real mbi milionat që qarkullon nga një zë i buxhetit në tjetrin, thjesht e vetëm se ka shumicën e kartonëve.
Dhe pasi dha shfaqjen, herë me batuta e herë me akuza, herë si i nxehur dhe herë duke qeshur, Veliaj u largua nga mbledhja, i bindur se ata që ndodheshin në sallë, do të miratonin çdo propozim të tij, pavarësisht kundërshtive që vinin nga këshilltarët e opozitës.
“Zoti Qelia”, iu drejtua këshilltari i PL, Tedi Blushi, kryebashkiakut Veliaj, frazë që duket se e acaroi këtë të fundit, duke i kthyer reston teksa i kujtoi akuzat ndaj Ilir Metës, ish-Presidentit dhe kreut të PL-së, si spiun të Sigurimit të Shtetit.
“Erion Qelia ti sot i sjell Këshillit Bashkiak për miratim propozimin për shtese fondesh për inceneratorin inekzistent dhe nën sekuestro të Tiranës. Në vend të ishe sot i pandehur para drejtësisë vjen bën monologë para këshillit. Je keqbërësi më i madh i kryeqytetit dhe abuzuesi më i madh i taksave të qytetarëve. Për mega-aferën e inceneratorit duhet të ishe marrë i pandehur.
Ti sot quhesh ‘Erion Qelia’. ‘Erion Qelia’ flet për humanizmin ndërkohë që refuzon në shkelje të ligjit dhe rregullores së këshillit kërkesën për lejimin në mbledhje të Kryetarit të Shoqatës së Para dhe Tetraplegjikëve. ‘Erion Qelia’ nga frika e përballjes me qytetaret dhe me transparencën e ka mbushur sallën me badigardët e tij dhe nuk lejon invalidët në karrocë dhe gazetarët që presin jashtë dyerve të bashkisë.
Ti ‘Erion Qelia’ duhet të merresh i pandehur dhe të dalësh para drejtësisë! Mega-Firma e paligjshme që ndryshoi fatin dhe i dha jetë kësaj vepre korruptive të inceneratorit të Tiranës, është e juaja pa mbledhur Këshillin Bashkiak dhe duke shkelur ligjin e pushtetit lokal Me këtë firmë të paligjshme, ti ‘Erion Qelia’ fute në borxh të gjithë qytetarët e Tiranës për 30 vite në shërbim të mafias së inceneratorëve. ‘Erion Qelia’ dili “për zot” firmës!”, tha Blushi.
Ilir Alimehmeti, kreu i grupit të këshilltarëve të “Bashkë Fitojmë” tha për mediat se Këshilli Bashkiak i vendosi 6 mln euro të tjera në dispozicion inceneratorit që është në sekuestro”.
“Nuk mund të ishim dakord”, tha Alimehmeti, duke konfirmuar votën kundër të grupimit që drejton.
Nënkryetari i Këshillit Bashkiak, Dorian Teliti tha se paratë e shkollave po shkojnë për një incenerator fantazmë.
“Në sallën e Këshillit Bashkiak, Veliaj shpërtheu në të bërtitura dhe fyerje ndaj këshilltarëve të opozitës që kundërshtuan pagesën qindra miliona lekë për inceneratorin që nuk ekziston. Këshilltarët e opozitës u pritën nga 30 policë. Kush mendon se mund të intimidojë këshilltarët e opozitës, gabon rëndë. Veliaj i hoqi të drejtën opozitës, mbajti ligjëratën mashtruese dhe u largua.
Janë 600 milionë lekë të reja, janë 6 milionë euro që merren nga paratë e shkollave dhe kopshteve dhe çohen për të paguar inceneratorin fantazmë,” tha ai.
Kemi dyshime të forta se prona publike e Gardës së Republikës i jepet në formati klientelist, një përfaqësuesi të lartë të PS,” theksoi Teliti.
Discussion about this post