60 familje të komunitetit Romë në qytetin e Beratit jetojnë në skamje dhe varfëri të plotë. Reth 600 banorë të këtij komuniteti janë strehuar në periferi të Beratit me kasolle e çadra. Ata jetojnë mes baltës, plehrave dhe varfërisë, të pashpresë se kjo situatë do të ndryshojë.
E vetmja mënyrë jetese për këtë komunitet është shitja e rrobave të përdorura me tezga nëpër tregje, ndërkohë që shumë prej tyre i mbajnë familjet me bukë duke shitur kanaçet që mbledhin në koshat e plehrave ose duke mbledhur hekurishte.
Banorët shprehen se, jetojnë në varfëri ekstreme sepse nuk kanë asnjë të ardhur ekonomike, ndërsa rrogat që marrin me punë në të zezë, nuk mjaftojnë as për të blere produktet bazë.
“Mbledhim kanaçe në koshat e plehrave dhe i shesim, me to arrijmë të sigurojmë 200 lekë (të reja) në ditë, sa për të blerë bukë ose shesim rroba të përdorura me tezga në tregje. Jetojmë në kasolle të shkatërruara, flemë në çimento dhe në dimër i gjithë shiu që bie jashtë na hyn brenda në banesë. Shteti nuk i ka hedhur asnjëherë sytë nga ne pasi jemi romë, nuk marrim as përkrahje sociale dhe as pension, ndërkohë që çdo familje jona përbëhet nga shumë anëtarë”-, u shprehen banorët e komunitetit rom për mediat.
Ky komunitet është vendosur në periferi të qytetit të Beratit, në zonën që njihet si “Ish Pjeshkorja” rreth viteve 1985, në këtë zonë u vendosën edhe familjet e tjera rome që erdhën më pas.
